Ońtústik Qazaqstan oblysy — qashannan agrarly óńir. Oblysta 5 mıllıon 674 myń gektardan astam jaıylym, 1 mıllıon 13 myń gektardan astam egis alqaby bar. Onyń ishinde 470 400 gektary — sýarmaly egistik. Osynaý orasan zor baılyqty el ıgiligi jolynda tıimdi paıdalaný — mańyzdy mindet. Sondyqtan «Agrobıznes – 2020» baǵdarlamasynyń oblystaǵy oryndalý barysyna toqtalmaı ótý múmkin emes. Oblystyq aýyl sharýashylyǵy basqarmasynyń málimetterine súıensek, bıyl atalǵan salany damytýǵa 28 mıllıard 723,2 mıllıard teńge bólingen. Onyń 3 mıllıard 210 mıllıon teńgesi respýblıkalyq búdjetten qaralǵan.

Baǵdarlamanyń birinshi baǵyty agroónerkásip kesheni sýbektileriniń nesıesi men lızıńtik mindettemeleriniń paıyzdyq ústemeaqysyn sýbsıdıalaýǵa arnalǵan. Bul baǵyttyń ákimshisi osyǵan deıin QR Aýyl sharýashylyǵy mınıstrligi bolyp kelgen. Aǵymdaǵy jyldyń ekinshi jartysynan bastap bul quqyq jergilikti búdjetke berilýde. Al, ekinshi baǵyt boıynsha túrli taýarlar, jumystar men qyzmetterdiń aýyl sharýashylyǵy nysandary úshin ekonomıkalyq qoljetimdiligin qamtamasyz etý kózdelgen. Aǵymdaǵy jyly agroónerkásip kesheni sýbektileriniń ınvestısıalyq salymdar kezindegi shyǵynyn óteýge 6 mıllıard 125,4 mıllıon teńge bólinse, esepti kezeńde sonyń 2 mıllıard 227,9 mıllıon teńgesi ıgerilgen. Sondaı-aq, elıtaly tuqym men kóshettiń, janar-jaǵarmaıdyń, mıneraldy tyńaıtqyshtardyń, aǵyn sýdyń qoljetimdiligin arttyrýǵa, egiletin tuqym men otandyq maqta talshyǵynyń sapasyn anyqtaıtyn saraptamalar ótkizýge, sondaı-aq, aýyl sharýashylyǵy ónimderin tereń óńdeıtin kásiporyndardyń shyǵyndaryn sýbsıdıalaýǵa qomaqty qarjy jumsalǵan. Memleket tarapynan kórsetilip jatqan osynaý qoldaýdyń arqasynda aýyl sharýashylyǵy salasyndaǵy ónim kólemi bıyl qańtar-shilde aralyǵynda ótken jylǵy tıisti kezeńmen salystyrǵanda 2 paıyzǵa artyp, 160 mıllıard teńgeni qurady.

Minekı, osynyń barlyǵy jergilikti memlekettik organdardyń Elbasy tapsyrmalaryn oryndaý baǵytyndaǵy jumysynyń nátıjeli ekeniniń aıǵaǵy. Memlekettik baǵdarlamalardyń qaı-qaısysynyń da qabyldanǵan kezdegi túpki maqsaty — halyqtyń turmysynyń túzelip, tabysynyń artýyna sep bolý. Bizdińshe, memleket tarapynan atqarylyp jatqan osynaý aýqymdy jumystar jerlesterimizdiń kúndelikti ómirine tek qana oń áser etýde.

http://adym.kz/