Kóp jyldar boıy maqta ónerkásibinde brıgadany jetekshilik etken eńbek ardagerimin. Osy oraıda óndiristi damytý haqyndaǵy óz oıymmen bólissem dep edim. Sondyqtan uqqanym, maqta sharýashylyǵyndaǵy ǵylymı-zertteýlerdi damytý, otandyq básekege qabiletti maqtanyń jańa sorttaryn shyǵarý, jalpy maqta óndirýdiń tıimdiligin ınovasıalyq tehnologıalardy óndiriske endirý arqyly arttyrý maqsatynda biraz jetistikterge jettik.

          Alaıda túsingenim, jańa tehnologıalardy óndiriske engizý fermerlerdiń arnaıy bilimi jetkilikti bolǵanda ǵana jaqsy nátıje beredi. Ókinishke qaraı, árbir 100 fermerdiń 13-inde ǵana arnaıy orta jáne joǵary bilimi bar, bul óte tómen kórsetkish. Osy problemany sheshý maqsatynda Qazaq Ulttyq agrarlyq ýnıversıteti basshylyǵy jáne mamandarymen tyǵyz baılanysta jumys júrgizilip keledi. Osy jumystar budan da úlken ilgerileý lasa degen oı bar.  Bilikti mamandarmen birlesip atqarǵan jumys barlyq ýaqytta jaqsy nátıje beretini belgili, sondyqtan elimizdegi maqta óndirý, ony tereń óńdep eksportqa shyǵarý qolymyzdan keletin jumys dep esepteımin.

          Al endi sheteldik maqta satyp alatyn treıderler elimizde bosqa júrmegeni belgili. Eger sheteldik treıderler bizdiń elimizden «oljalap» jatqan mıllıondaǵan paıdany tabýmen óz elimizdegi iri bıznes ókilderi, kásipkerler aınalysyp, qyrýar qarjy óz elimizde qalar edi ǵoı.

          Maqta ónerkásibi bizdiń elde ekinshi valútalyq daqyl bolǵandyqtan, Úkimet qaýlysymen bıdaı sıaqty strategıalyq daqyldar qataryna ense, «aq altynǵa» degen kózqaras ózgeretin edi ǵoı.  Al, maqtaǵa kózqaras durys bolsa, saladaǵy birqatar problemalar ózinen-ózi sheshilip keteri sózsiz. Maqta – elimizdegi úlken tabys ákeletin 100 jyldyq tarıhy bar daqyldardyń biri. Sondyqtan osy saladaǵy máselelerdi birlesip júıege túsirsek qana mol ónimge qol jetkizemiz.

Sovetbek Qanapıauly, «Ońtústik Qazaqstan» gazeti