OQO-da Údemeli ındýstrıalyq-ınnovasıalyq damý baǵdarlamasynyń qardylandyrý kózi bolyp tabylatyn "Yrys" qarjy uıymy arqyly "Jumyspen qamtý 2020" baǵdarlamasy aıasynda 1003 joba qarjylandyrylǵan.  Bul týraly búgin OQO aımaqtyq komýnıkasıalar ortalyǵynda ótken baspasóz brıfıńinde memlekettik «Jumyspen qamtý 2020» jol kartasy baǵdarlamasy aıasynda óńirimizdegi «Yrys» mıkroqarjy uıymynyń dırektory Hılola Nazarmetova málimdedi dep habarlaıdy oblys ákimdiginiń resmı saıty. 2011-2015 jyldar aralyǵynda atalǵan baǵdarlama aıasynda qarjy uıymy 1003 jobany 2,1 mıllıard teńgege qarjylandyrdy. Onyń ishinde mal sharýashylyǵy boıynsha 1,8 mıllıard teńgege 888 joba; egin sharýashylyǵy boıynsha 106,5 mıllıon teńgege 44 joba; al ár túrli qyzmet túrleri boıynsha 150 mıllıon  teńgege 71 joba júzege asyrylǵan. «Bıyl atalǵan baǵdarlama boıynsha oblysymyzǵa 7,0 mıllıard teńgeden astam qarajat bólinip, onyń 3,8 mıllıard teńgesi «Aýylsharýashylyǵyn qarjylaı qoldaý qory» arqyly taratyldy. Ol jerde kásipkerlerge eń joǵarǵy soma 3,0 mıllıon teńgege deıin berildi»,- dedi H.Nazarmetova. Aıta keteıik, qarajatty alýǵa nıet bildirgen azamattar eń aldymen «Jumyspen qamtý 2020» jol kartasy baǵdarlamasynyń talaptaryna saı kelý kerek. Beriletin nesıeniń maksımaldy somasy 6,0 mıllıon teńge, jyldyq syıaqysy 7%, 54 aıǵa deıin beriledi. Al nesıe alýshylarǵa qoıylatyn talaptary retinde, bıznesti (jobany) iske asyratyn ornynyń bolýy, nesıe tarıhynyń taza jáne sońǵy 12 aı ishinde tólemi keshiktirilgen nesıesi bolmaýy shart.

^{http://rgmedia.kz/}