Qazyǵurt aýdanynda búginde jylyjaı kólemi 90 gektarǵa jetip otyr. Osy maýsymda atalǵan jylyjaıdan qazyǵurttyq dıqandar 19875 tonna kókónis, 4647 tonna baqsha daqyldaryn jınady. Munda ár maýsymda 200-deı azamat eńbek etedi.
Taýly aımaqta jylyjaı salýda turbattyqtar ozyp tur. Solardyń biri «Rahmat ata» sharýa qojalyǵy. El alǵysyna bólengen ujym 20 azamatty jumyspen qamtyp otyr. Seriktestik 1,6 gektar jerde «Atıa» qyzanaǵy men «Týmı» qıaryn egip, búginde ekinshi kezeńniń daqyldaryn jınaýda.
Turbat aýylynyń halqy jylyjaı sharýashylyǵyn damytýǵa beıimdelgen. Jıyrma gektardan astam jerdiń ár gektarynan 100 tonnadan astam baý-baqsha daqyldaryn jınap alyp otyr.
Aıta ketken jón, aýdan sharýalary otandyq ónimdi Shymkentten bólek, Almaty, Astana qalalaryna jóneltýde.
Qazyǵurt aýdanynyń jáne bir turǵyny B.Meldebekov «Jylyjaı» baǵdarlamasy boıynsha nesıege 12,5 mln. teńge alyp, úı janyndaǵy jylyjaıdy damytýǵa kirisken.
Nesıe qarajatyna Begimjan kólemi 0,12 gektar bolatyn, qajetti qural-jabdyqtarmen, jylý júıesimen qamtylǵan jylyjaı satyp aldy. Jetkizýshi kompanıa jylyjaıdy «kiltke deıin» tapsyrdy. Kepildeme retinde klıent óz úıin, úı irgesindegi sharýashylyq qurylystardy, jer ýchaskesi men jylyjaıdy qoıdy.
Jobany júzege asyrýǵa ońtústik koreıalyq «KOREAGREENHOUSE CO LTD» kompanıasynyń tehnologıalary boıynsha «Zero Max KZ» JSHS usynǵan Qazaqstanda shyǵarylatyn qural-jabdyqtar alyndy. Ol – nesıeleý baǵdarlamasynyń talaptaryna baǵasy men joǵary tehnıkalyq sıpattamalary jaǵynan da sáıkes keledi.
Jylyjaı eki qabat plenkamen jabylǵan sınkilengen metal qańqadan, tamshylatyp sýarý, jeldetý jáne jylý júıelerinen turady. Jalpy, jylyjaıdyń qurylymy shaǵyn mólsherine qaramastan — jınaǵanda ońaı, myqty jáne turaqty, ekstremaldy jaǵdaıǵa, ylǵal men korozıaǵa tózimdi etip jasalynǵan.
Aıta keteıik, Ońtústik Qazaqstan oblysy elimizdegi eń iri aýyl sharýashylyǵy ortalyqtarynyń biri bolyp tabylady. Sonymen qatar, Qazaqstandaǵy jylyjaılardyń 87 paıyzy osy bizdiń oblysta ornalasqan. Olardyń jalpy kólemi 1 myń gektardan asady.
http://adym.kz/
