Ánshi Sáken Maıǵazıev ózge áriptesteri sekildi depýtat bolýdy kózdemeıtinin, alaıda bolashaqta mádenıet mınıstri bolǵysy keletinin aıtty, dep jazady Stan.kz.

Maıǵazıev «Kompromat» baǵdarlamasy barysynda telejúrgizýshi Gúlbarshyn Zaırovanyń «Joǵarǵy jaqtan buıryq ne usynys tússe, depýtat bolýǵa kelisesiz be?» degen saýalyna:

«Depýtat bolý úshin bilim kerek, ilim kerek, sana kerek. Sol sebepti men daıyn emespin dep oılaımyn. Óner salasynda qyzmet atqaryp júrgennen keıin eger ónerge paıdań tıedi dep óner salasyndaǵy qyzmetke shaqyratyn, usynatyn bolsa, oılanar edim», – dep jaýap berdi.

Ánshiniń bul sózin nazarǵa alǵan teleprodúser Gúlnur Mamassarıpova tosynnan «shabýyl» jasap, «Bolashaqta mádenıet mınıstri bolǵyń kele ma?» dep saýal tastaǵan. Oǵan Sáken Maıǵazıev oılanbastan: «Bolǵym keledi» dep jaýap berdi. Onyń sebebin bylaısha túsindirdi:

«Ózekti máseleler óte kóp. Eń aldymen, keńesshiler qoǵamyn uıymdastyrǵan bolar edim. Sebebi estradany saralap, saraptaý kerek».