Sońǵy eki jylda Ońtústik Qazaqstan oblysynda iri qara mal sany 35 myńǵa artyp, 865 myń basty qurasa, jylqy 16 myńǵa artyp, 230 myńǵa jetti. Al qoı men eshki 155 myńnan 3 mln. 893 myńǵa deıin artqan. Osy merzim ishinde et óndirý  111,4 paıyzǵa, sút óndirý 104,8  paıyzǵa, jumyrtqa óndirý 112,1 paıyzǵa, jún óndirý 110,1 paıyzǵa artqan. Degenmen, iri qara mal sany Báıdibek, Ordabasy, Qazyǵurt aýdandarynda, al ýaq mal Báıdibek, Ordabasy, Sozaq, Tólebı aýdandarynda, jylqy Báıdibek, Túlkibas aýdandarynda, túıe Báıdibek, Saryaǵash, Túlkibas aýdandarynda, qus sany Báıdibek, Qazyǵurt, Saıram, Túlkibas aýdandarynda kemigen. Bul týraly oblystyq aýylsharýashylyǵy basqarmasynyń basshysy Serik Turbekov oblys ákimi Janseıit Túımebaevtyń tóraǵalyǵymen ótken ákimdiktiń kezekti májilisinde málim etti.

25 jylda ishki naryqty mal sharýashylyǵy ónimderimen tolyq qamtamasyz ete almaı kele jatqanymyzdy tilge tıek etken oblys basshysy ózimizde óndiriletin ónimder áli de básekege kabileti tómen bolǵandyqtan, ózge oblystardy bylaı qoıǵanda, jergilikti tutynýshylardyń arasynda da shet eldiń ónimderin satyp alýǵa májbúr azamattardyń az emestigine de toqtaldy. Sol úshin sanmen birge sapa máselesine de aıryqsha den qoıý kerektigin tapsyrdy. Sol sekildi veterınarıalyq qaýipsizdik máselesi de mal sharýashylyǵyn damytýǵa úlken úles qosatynyn atap ótip, osy maqsatta júıeli túrde jumys júrgizilý qajettiligi sóz boldy.