Qyzylorda qalasynda Oblys ákimdiginiń qoldaýymen Táýelsizdiktiń 25 jyldyǵyna arnalǵan halyqaralyq alaman aıtys ótti.

Qazaqstan, Qyrǵyzstan, Qytaı, Monǵolıadan aqyndar qatysqan alaman doda boldy. Aıtys nátıjesi tómendegideı: Bas júlde (shetel avtokóligi) -  Muhtar Nıazov (Qyzylorda) Birinshi oryn (avtokólik) -Ularbek Mınatxan (Qytaı) Ekinshi oryn (ekeý, jeti júz myń teńgeden) - Serikzat Dúısenǵazy (Astana), - Sara Toqtamysova (Astana) Úshinshi oryn (ekeý, tórt júz myń teńgeden) - Dıdar Qamıev (Qaraǵandy) - Meıirbek Sultanhan (Qyzylorda) Arnaıy júlde (ekeý, tórt júz myń teńgeden) - Elmırbek Imanálıev (Qyrǵyzstan), - Asylbek Maratov (Qyrǵyzstan). 

Aıtystyń birinshi oryn júldesi Ularbek Mınathannyń qanjyǵasyna baılandy. Birinshi orynǵa da berilgen avtokólikti ıelengen Ularbek Mınathanuly Júrsin Ermannyń arnaýly shaqyrýymen Qytaıdan kelgen qandasymyz. Ol Altaıdyń aq ıyq aqyny Erkin İlıasulynyń tól shákirti. Erkin mektebiniń sarynyn aıtys súıer aǵaıynnyń aldyna ala kelgen Ularbek Alǵashqy aınalymda  Bolatbek Orazbaıulymen aıtysty. Ekeýiniń aıtysy Erkin men Orazdyń aıtysyndaı áser qaldyrdy. Ol Bolatbek Orazbaıuly men Serikzat Dúısenǵazındy «birińǵaı onmen» jeńip, fınalǵa shyqty. Aıtysynda:

«Simirgen Ór Altaıdyń taza aýasyn, 

Jigitpin isim adal taza basym. 

Aǵaıyn bilesiń be Altaıymda, 

Erkindeı ótken edi ǵajap aqyn. 

Bul jaqqa kelem degen armanyna, 

Jete almaı ketip edi azamatym. 

Úsh jyl buryn ómirden attanyp ed(i), 

Qapıada mert bolyp qazanatym. 

Áýenimdi osy elge jetkiz degen, 

Kórset dep darqandyqtyń ǵalamatyn. 

Salaıyn aldaryńda áýenine, 

Oryndap ustazymnyń amanatyn», - Dep jyr nóserin seldetip, halyqty tebirentken Ularbek Mınathanuly ótken jyldyń dál osy kúninde Qytaıdaǵy qandastarymyz arasynda ótken úlken televızıalyq joba «Jeztańdaı» aqyndar aıtysynda 48 aqynnyń arasynan sýyrylyp shyǵyp, bas júldesin qanjyǵaǵa baılaǵan edi. Ol Qytaıdaǵy aqyndar aıtysynda berilgen júldedegi alǵashqy avtokólikti mingen bolatyn.

Arǵy bettegi aǵaıynnyń sálemin Atajurtqa jyrmen jetkizip, táýelsizdikti jyrǵa qosqan Ularbek Mınathanulynyń jeńisin quttyqtaımyz.

Erlan Tóleýbaı