Bıyl Qazaqstan Respýblıkasy úshin aıtýly mereke – el Táýelsizdiginiń 25 jyldyǵy. Bul táýelsizdik bizdiń ata-babalarymyzdyń jankeshti kúresiniń nátıjesi. Qazaq memlekettiliginiń irgetasyn qalaýǵa «Alash-Orda» qozǵalysynyń qaıratkerleri  orasan zor úles qosqany málim. HH ǵasyr basyndaǵy qazaq ıntellıgensıasynyń ozyq ókilderi Á.Bókeıhanov, A.Baıtursynov, M.Dýlatov, H.Dosmýhamedov jáne basqa Alash arystary Qazaqstannyń qazirgi aýmaǵyn keńestik bılikke moıyndatyp, memlekettiliktiń negizin qalap ketti.  

Osyǵan oraı, «Degdar» qoǵamdyq kelisimdi qoldaý» qoǵamdy qory kórnekti qalamger, ǵalym, profesor Tursyn Jurtbaıdyń «Alash» qozǵalysy jónindegi zertteýleri negizinde 3 tomdyq basylymdy jaryqqa shyǵardy. Basylym muraǵat derekterinen, Alash qaıratkerleriniń sot prosesi materıaldarynan, tergeý hattamalary men kórsetindilerden, hattardan turady.  

Búgingi tańda Alash arystarynyń ǵumyry men shyǵarmashylyǵyn, qyzmetin óskeleń urpaqqa úlgi-ónege qylý –  mańyzdy mindet. Alash qaıratkerleri týraly árbir derek Alash ıdeıasynyń mánin ashyp kórsetýge, el egemendigi úshin olardyń qandaı qurbandyqqa barǵanyn tereń uǵynýǵa múmkindik beredi. Alash qozǵalysyn jan-jaqty zertteý, tarıhı ýaqıǵalardyń mán-mańyzyn ashyp kórsetý jastardy ulttyq rýhta tárbıeleý, jańa Qazaqstannyń strategıalyq mindetterin iske asyrý mindetterine tolyq sáıkes keledi.

«Degdar» qoǵamdyq kelisimdi qoldaý» qoǵamdyq qorynyń uıymdastyrýymen Kitaptyń tusaýkeseri 2 jeltoqsan kúni Almaty qalasyndaǵy Jambyl atyndaǵy jastar kitaphanasynda ótedi. Kitap túpnusqa qujattar boıynsha oryssha, qazaqsha eki tilde shyqty. Tusaý keser 14:00-de bastalady.