Jer paıdalaný týraly zań aldaǵy ýaqytta ózgerýi múmkin. Bul týraly KTK arnasy habarlady.

Aýyl sharýashylyǵy mınıstrligi maratorıı jarıalanǵan Jer kodeksinen bólek, jańa zań jobasyn ázirlep jatyr.

«Bir qolǵa shekteý qoıyp otyrmyz. Buryn bir qolǵa shekteý tek qana jekege satylǵanda ǵana bolatyn. Al endi egerde jalǵa alatyn bolsań, bul jerde de bir qolǵa shekteý aıtylǵaly otyr. Bul da alǵash ret qabyldanǵaly otyrǵan normalardyń biri», - dep málimdedi mınıstr.

Myrzahmetov málimdegendeı, Jerdi paıdalanýshyǵa da talap eki esege kúsheıedi. Alqaptardy jalǵa bermes buryn respýblıkalyq baıqaý jarıalanady. Jáne fermerden aldyn ala bıznes jospar talap etilmek. Iaǵnı, kásipker jalǵa alǵan jerge ne egetinin kúni buryn kórsetýi kerek.

Myrzahmetov «Jer» týraly jańa zań jobasyn jaqyn kúnderi parlamentke tanystyrmaqshy. Budan bólek, Aýyl sharýashylyǵy mınıstri qazir qoldanystaǵy 24 mıllıon gektar alqaptaǵy bıdaıdyń kólemin qysqartyp, ornyna jem-shópti arttyrmaq. Óıtkeni, elimizde malǵa azyq jetpeı jatyr eken. Sondaı-aq depýtattar esep berýge kelgen Myrzahmetovten sýbsıdıanyń da nátıjesin surady. Sońǵy úsh jylda aýyl sharýashylyǵyna bólingen sýbsıdıa 500 mıllıard teńgeden asypty. Biraq qyrýar qarjy tıimdi ıgerilmeı jatyr. Májilismender jyl saıyn qyrylyp jatqan mal men kıiktiń sanyna da alańdaýly.  Baqtyqoja İzmuhambetov «Kıikterdiń ólgen jerinde mal nege ólmedi? Pasterelez birneshe jyldan beri belgili, ondaı aýrý bar ekeni. Oǵan qarsy shara qabyldap jatyrmyz, dep bir aıtylý kerek qoı. Bir de bir nárse estigen joqpyz», dep, mınıstrlikten naqty jaýap talap etti.