Prezıdent reseılik arnaǵa bergen suhbatynda ekonomıkalyq máselelerge toqtalǵan. Ol:

«Bizde bári bar. Munaı da, tústi metaldar da. Endi, osynyń barlyǵyn óńdeýge tyrysý qajet. Indýstrıalızasıanyń basty maqsaty da osy. Munaı arzandasa, ony óńdep, daıyn ónim retinde satý qajet. Gaz da solaı. Negizi, munaı xımıasynan plasmasqa deıin ónimniń túr-túrin jasaýǵa bolady. Qurylys materıaldary jáne taǵysyn taǵy. Oǵan qosa, allúmınıı, mys sıaqty metaldar bar. Al shıkizatty óńdep, daıyn ónim retinde satsa, odan da kóp paıda tabýǵa bolady», - degen eldiń áleýetin kóterýdiń jolyn nusqap.

Osy oraıda Prezıdent Qazaqstan men Reseıdiń agrarlyq keshen jaǵynan uqsas ekenin eske saldy. Alaıda osy saladaǵy shıkizat ta durys óńdelmeıdi. «Qazaqstanda da, Reseıde de úlken agrarlyq keshen bar. Alaıda biz bıdaıdy da, etti de, sútti de, kókónisti de aıaǵyna deıin óńdemeımiz. Eýropadan daıyn konservilerdi satyp ala salamyz. Ony ózimiz nege istemeımiz?.. Al endi osynyń bárin óńdep alý úshin mashına jasaý ónerkásibin barynsha damytý qajet. Ol óndiris zamanǵa saı bolýy shart. Máselen, munaıdy óńdeý úshin zamanaýı munaı óńdeý zaýyty qajet. Ol qural-jabdyqtar óte qymbat. Mine, osyny qolǵa alǵan jón. Sosyn nanotexnologıalar, balamaly energetıka, bıoxımıa sıaqty ǵylymı-texnologıalyq jumystardy da umytpaý qajet. Bir jaǵynan Reseıge sanksıa salǵan durys boldy. Qazir oǵan jaqsy bir serpilis kerek. Bilekti sybanyp, jumysqa kirisse, bir jerden jaryp shyǵady», - dep atap kórsetti Memleket basshysy.

Aıta ketsek, ótken jyldyń basynda munaı baǵasy quldyraı bastaǵan soń, Qazaqstan valúta baǵamyn erkin aınalymǵa jiberip, daǵdaryspen betpe-bet qalǵan edi.