Talaıǵa tańdaı qaqtyryp, 7 jasynan óleń jazyp, Qazaqstannyń rekordtar kitabyna engen jas aqyn Jambyldy bilmeıtin jandar kemde-kem. Sol bala Jambyl otaý ıesi jasqa kelip, qalyńdyq aıttyryp jatyr degen aqparat taraǵan bolatyn. Osyǵan oraı, QazAqparat aqparattyń aq-qarasyn anyqtaý úshin Jambyldyń anasy Kámshat Ibraıymovaǵa habarlasyp, istiń anyq-qanyǵyn suraǵan.

 «Anasy retinde aıtarym, bul aqparat múldem shyndyqqa janaspaıdy. Ózim pedagogpyn. QazMÝ-dyń fılologıa fakúltetin bitirgenmin. Men balama mundaı tárbıe esh ýaqytta bermes edim. Jambyl - bul bútin qazaq kózin tigip otyrǵan bala. Bizdiń eskini jańǵyrtý oıymyzda joq. Ár nárse óz ýaqytymen»,  - degen Jambyldyń anasy Kámshat  Ibraıymova.

Bala aqynnyń anasy Jambyldyń erteń ótetin shyǵarmashylyq keshinde «Móldir monshaq» degen ánniń oryndalatyndyǵyn atap ótti. «Shyǵarmashylyq keshinde «Móldir monshaq» degen ániniń oryndalatyndyǵy ras. Bul birinshi shyǵarǵan týyndysy, tusaýy kesiledi. Qazir onyń kompozıtorlyqpen de áýestenip júrgeni shyndyq. Áńgime osy ánnen shyqqan sıaqty. Biraq, ol eshkimge arnalmaǵan. Jambyldyń eki kitaby jaryq kórdi. Endi mine, úshinshi kitaby daıyn tur. Mádenıet jáne sport mınıstrliginiń qoldaýymen jaqyn arada «Óleńim - ómirim» degen atpen shyǵady. Tuńǵysh kitaby «Táńirden kelgen tátti syı» degen ataýmen aýdıo túrinde shyǵyp, balabaqshalarǵa taratyldy. Ekinshi kitaby Elbasy qorynyń qoldaýymen «Perishte tilek»  degen atpen jarıalandy», - dedi Kámshat Ibraıymova.