Gúlnur Orazymbetova ózin “otbasyn buzǵan áıel dep synaǵandarǵa jaýap berdi. Ol qazirgi joldasyn ózine qaratý úshin eshnárse jasamaǵanyn aıtady. Tipti, odan birinshi otbasynan ne sebepti ketkenin de suramaǵan eken dep habarlaıdy Stan.kz.

Bul týraly 31 arnanyń “Uıat emes” baǵdarlamasynda aıtyldy.

– Qazirgi kúıeýińmen 19 jasyńda tanysqan ekensiń. Qyzyqty romantıkalyq kezdesýleriń týraly aıtyp bershi.

– Negizi men qazaqqa belgili azamatpen bas qostym. Jas kezimde el aldynda dombyramen án aıtatynmyn. Sol kezde ónerime ǵashyq bolǵan eken. Qazir “Bir kórgennen ǵashyq bolǵan ekensiń” dep aıtyp kúlemiz. Ol kezde kıimim de, túrim de durys emes edi. Sol balalyq minezim men ónerime ǵashyq bolǵan eken. Osynyń dáleli retinde áli kúnge deıin sahnadan alystatpaı júr. Muny bir Allanyń maǵan tartý etken baqyty dep bilemin.

– Senen 20 jas úlken. Bastapqyda qamqorshy aǵańdaı bolǵan shyǵar.

– Ákem qatal kisi bolǵandyqtan, ol kisige erkelep ósken emespin. Sondaı bir erkeletetin adam jetispegendeı bolyp turatyn. Kúıeýim qyzmet babynda qatal bolǵanymen, óte baýyrmal kisi. Minezi jumsaq. Meni áli kúnge deıin erkeletedi. Eki ulymyzdan keıin qyzdy bolsaq dep armandap júrmiz. Keıde ishimde bul kisiniń bar nazary qyzymyzǵa aýyp kete me degen qyzǵanysh paıda bolady. Sebebi, kúıeýim “Qyz týyp berseń, jórgegin ózim aýystyryp, ózim qaraımyn. Sen jumysyńa bara ber” dep aıtady.

– Joldasyńnyń birinshi áıeli bolǵanyn bildiń be? “Gúlnur otbasyn buzdy, ońbaǵan” dep neshetúrli áńgime aıtatyndarǵa qandaı jaýabyń bar?

– Árıne, bildim. Otbasy da, balalary da boldy. Otbasyn buzdyń dep aıyptaıtyndarǵa bir ǵana jaýabym bar. Ádemi bolyp otyrǵan otbasynyń oıran bolǵanyn eshkim de tilmeıdi. Munyń barlyǵy – mańdaıǵa jazylǵan dúnıeler. Ol kisi otbasynan tek men úshin ketken joq. Ádette kúıeýimnen birinshi otbasyna qatysty eshnárse suramaımyn. Ózderi osyndaı sheshimge keldi.

– Ekeýiń biraz ýaqyt birge aralastyńdar. Sol kezde ony birinshi áıelinen qyzǵandyń ba?

– Qyzǵanǵan joqpyn. Bul men úshin qalypty dúnıedeı kórindi. Eń bastysy, men ol kisini qyzǵanyp, artynan júgirgen emespin. Men kúıeýimdi jaqsy kóremin. Ol kisi de meni jaqsy kóredi. Ol óz ómirin, men óz ómirimdi súremin. Bir-birimizge kedergi jasamaımyz. Artyq eshnárse suraǵan da emespin. Mysaly, qaltamda aqsha bolmaı tursa, konsertten, toıdan qalmaımyn. Jas kezimde ol kisi kelgende dastarhandy jaınatyp jiberip, shaıymdy beretinmin. Ol kisiler jeıtin qyzyl balyqqa deıin satyp alamyn. Qazir “Sol qasıetińmen baýrap aldyń” dep ózi de aıtyp otyrady.

– Senderdiń jýyrda ǵana nekeleskenderiń ras pa?

– 20 jyldan beri biz Allanyń aldynda birgemiz. Al resmı nekeleskenimizge 8 jyl boldy. Ekinshi balamyz osy jeltoqsan aıynda 8 jasqa keledi. Aldynda biz qazaqy dástúrmen nekemizdi qıǵanbyz. Men nekemiz resmı qıylsyn dep talap qoıǵan emespin.