Jemqorlyq jasady dep aıyptalyp, 10 jylǵa sottalyp, jazasyn ótep jatqan Qazaqstannyń burynǵy premer-mınıstri Serik Ahmetovke Táýelsizdiktiń 25 jyldyǵyna oraı jarıalanǵan raqymshylyq berilýi múmkin. Bundaı pikirdi belgili zańger Sergeı Ýtkın aıtqan.
Sputnik Qazaqstan agentti habarlaýynsha, «Jemqorlyq týraly baptarǵa da raqymshylyq berilýi múmkin. Olardyń da ortasha, aýyr, asa aýyr túrleri bolady. Sondaı-aq keltirilgen shyǵyn kólemine de baılanysty, úlken nemese úlken emes quqyqbuzýshylyq. Sol sebepti de jemqorlyq týraly baptarǵa raqymshylyq berilýi múmkin», — degen Ýtkın «Sputnik Qazaqstan» agenttigine bergen suhbatynda.
Serik Ahmetov: 2012 jyldyń qyrkúıeginen 2014 jyldyń sáýir aıyna deıin Qazaqstan premer-mınıstri qyzmetin atqaryp, otstavkaǵa ketken. Budan soń ol qorǵanys mınıstri bolyp taǵaıyndalyp, sol jyly qazan aıynda qyzmetinen bosatylǵan edi. Serik Ahmetov oǵan deıin Qaraǵandy oblysy ákimi (2009), premer-mınıstrdiń birinshi orynbasary (2012) qyzmetterin atqarǵan.
Aıta keter bolsaq, búgin Májiliste raqymshylyq týraly zań jobasy qaraldy. Osyǵan oraı jalpy otyrysta Zańnama jáne sot-quqyqtyq reforma komıtetiniń tóraǵasy Nurlan Ábdirov:
«Osy jyly Qazaqstan Táýelsizdiginiń 25 jyldyq mereıtoıyn atap ótýde. Respýblıka Konstıtýsıasy adam jáne adamnyń ómiri, quqyqtary men bostandyqtaryn eń qymbat qazyna dep jarıalaıdy. Gýmanızm qaǵıdatynyń bir kórinisi oǵan sáıkes raqymshylyq jasaý aktin qoldanatyn zańdy qabyldaý bolyp tabylady. Zań jobasyna sáıkes, azamattardyń áleýmettik álsiz toptary, sonyń ishinde kámeletke tolmaǵandar, júkti áıelder, kámeletke tolmaǵan nemese múgedek balalary bar áıelder, múgedekter, qart adamdar, sondaı-aq aýyr emes qylmystyq quqyq buzýshylyqtar jasaǵandar qylmystyq jazadan bosatylady»,- degen edi.
Eske salsaq, keshe Memleket basshysy Konstıtýsıanyń 61-babynyń 1-tarmaǵyna sáıkes óz bastamasymen Parlament Májilisiniń qaraýyna «Qazaqstan Respýblıkasy Táýelsizdiginiń jıyrma bes jyldyǵyna baılanysty raqymshylyq jasaý týraly» zań jobasyn engizdi.
Osyǵan baılanysty «Qamshy» portalynda «Prezıdenttiń kezekti raqymshylyǵyna laıyq, Táýelsiz Qazaqstannyń damýyna óz úlesterin qosqan, qazir qamaýda otyrǵan tanymal azamattar» týraly maqala jarıalanǵan bolatyn.
Aqparattandyra ketsek, Serik Ahmetov raqymshylyqqa ilinip bosap shyǵar bolsa ol raqymshylyqqa ilingen alǵashqy mınıstr bolmaıdy. Buǵan deıin «alaıaqtyq» babymen aıyptalyp, 7 jylǵa sottalǵan mınıstr Jaqsylyq Aqmyrzauly Prezıdenttiń raqymshylyq Jarlyǵymen jazasy 2 jylǵa tómendetilip bosap shyqqan bolatyn. Jaqsylyq Dosqalıev 2008 jyldyń qarasha aıynan - 7 qazan 2010 jyldar aralyǵynda Qazaqstan Respýblıkasynyń Densaýlyq saqtaý mınıstri qyzmetin atqardy.
