Beıbit jıyndar men mıtıń uıymdastyrǵany, ultaralyq arazdyqty qozdyrǵany jáne jalǵan lańkestik úshin sottalǵandar raqymshylyqqa ilikpeıdi. Búgin Parlament Májilisinde «Qazaqstan Respýblıkasy Táýelsizdiginiń 25 jyldyǵyna baılanysty raqymshylyq jasaý týral» zań jobasy boıynsha jumys toby otyrysynyń aldynda tilshilerge suhbat bergen QR Bas prokýrorynyń birinshi orynbasary Iogan Merkel osylaı málim etti, dep habarlaıdy QazAqparat.
«Bul bap zań jobasynyń tizilimine raqymshylyqqa shekteý retinde engizilgen. Iaǵnı, osy baptar boıynsha raqymshylyq qoldanýǵa shekteý qoıylǵan. Sonymen qatar, bir top adam jasaǵan jemqorlyq qylmysqa nemese asa aýyr qylmystarǵa da tyıym salynady», - dedi Merkel. Onyń aıtýynsha, asa aýyr jemqorlyq qylmys jasaǵandar shyǵyndy tolyq kólemde ótegen jaǵdaıda jazany óteý merzimderin qysqartatyn bolady.
Budan buryn habarlanǵandaı, osy aptada Parlament Májilisiniń jalpy otyrysynda «Qazaqstan Respýblıkasy Táýelsizdiginiń 25 jyldyǵyna baılanysty raqymshylyq jasaý týraly» QR Zańynyń jobasy jumysqa alyndy. Eske sala keteıik, Memleket basshysy Nursultan Nazarbaev Konstıtýsıanyń 61-babynyń 1-tarmaǵyna sáıkes óz bastamasymen Parlament Májilisiniń qaraýyna «Qazaqstan Respýblıkasy Táýelsizdiginiń 25 jyldyǵyna baılanysty raqymshylyq jasaý týraly» zań jobasyn engizdi. Bul raqymshylyq sharasy zań buzǵan azamattarǵa qatysty izgilik aktisi, memleket tarapynan meıirimdilik pen senim bildirýdiń kórinisi bolyp sanalady.
Zań jobasyna sáıkes, azamattardyń áleýmettik álsiz toptary, sonyń ishinde kámeletke tolmaǵandar, júkti áıelder, kámeletke tolmaǵan nemese múgedek balalary bar áıelder, múgedekter, qart adamdar, sondaı-aq aýyr emes qylmystyq quqyq buzýshylyqtar jasaǵandar qylmystyq jazadan bosatylady. Memleket basshysy engizgen zań jobasy aǵymdaǵy jyldyń 30 qarashasynda Májilistiń jumysyna alynǵan edi.
Aıta keter bolsaq, «Qamshy» tilshisi Táýelsizdiktiń 25 jyldyǵyna oraı, Táýelsiz Qazaqstan damýyna óz úlesin qosqan, belgili jaǵdaılarmen túrmede otyrǵan, prezıdenttiń kezekti raqymshylyǵyna ilinýge laıyq azamattardy sanamalap kórgen edi.
Taqyrypqa tuzdyq bere ketsek, bıylǵy jyly 24 sáýirde Atyraýda ótken jer reformasyna qarsy mıtıńte ustalǵan Talǵat Aıan men Maks Boqaev 28 qarashada so úkimimen 5 jylǵa sottaldy.
