“Ańyz Adam” jýrnalyna qatysty sot sheshimi zor alańdaýshylyq pen okinish týǵyzady. Qandy Gıtlerdiń qylmystaryn aıyptap, tarıhtan sabaq alýǵa jáne bundaı zulmattyń XXI ǵasyrda qaıtalanýyna jol bermeýge shaqyrǵan basylymǵa jasalyp otyrǵan qysym múlde túsiniksiz. Jýrnaldyń mazmunymen tanyspaı, qalaısha osyndaı qatqyl áreketterge barýǵa bolady? Jýrnal muqabasyndaǵy Gıtlerdiń sýretine kelsek, sot pen ardagerler ondaǵy “Adamzattyń qasireti” degen batpandaı jazýdy, fashısik svastıkany qaq aıyryp turǵan qoldardyń sýretin nelikten elemedi? Dál sol Gıtlerdiń sýretin basyp shyǵarǵan reseılik “Pravda”, “Izvestıa”, “Komsomolskaıa pravdany”, amerıkandyq “Taım” men “Ýashınton Postty”, fransýzdyń “Fıgarosyn” basqa da myńdaǵan basylymdardy, fılmderdi, tom-tom kitaptardy nelikten eshkim qýdalaǵan joq, álde sol Gıtlerdiń ózi sekildi otqa jaqqan joq? Nemese "Ańyz Adam" sandarynyń birin qanisher Stalınge arnaǵanda eshkim nege óre túregelgen joq? Osyndaı ashshy da jaýapsyz suraqtar kóp. Kezinde Borıs Pasternaktyń da shyǵarmalaryn KSRO-da dál osylaı oqymaı jatyp aıyptaǵan, aıaýsyz kúıe jaqqan. Ne shyqty? Sońynan ony búkil álem moıyndap, Nobel syılyǵyn berdi. Búginde orys halqy Pasternakty maqtan tutady, al oǵan qıanat jasaǵanadardyń úni de qarasy óshken. Kezinde ur da jyq saıasattyń qurbandaryna Álıhan Bókeıhanov, Ahmet Baıtursynov, Mustafa Shoqaı, Júsipbek Aımaýytov, Maǵjan Jumabaevtar, basqa da qazaq halqynyń súıikti uldary, pýblısıseri, aqyn-jazýshylary aınaldy. Zaman óte olardyń ulyq esimderi kóshe men alańdarǵa berildi, al olardy Máskeý tapsyrysymen dáttegen, qınaǵan, ıtshe azaptap óltirgen shoshka-jendetter el qarǵysyna ıe boldy. Tajal KSRO dáýiri, azat oı men ádildikti janshyǵan reseılik otarlaý men represıalar zamany kelmeske ketti. Qazaqstan táýelsiz memleket boldy. Osyny túsiner ýaqyt, bógdeniń bolmasa da ózimizdiń tarıhtan sabaq alatyn kez jetti ǵoı. Shen men laýazym, qý aqshanyń býy ýaqytsha ǵana, al ar-ojdan, ıman, adamgershilik pen shyndyq - máńgilik jáne olar aldyndaǵy qylmys túbi jaýapsyz qalmaq emes.

(Rasýl Jumalynyń feısbýktegi paraqshasynan)