Táýelsizdik kúnine oraı barlyq oblystarda memlekettik qyzmetshilerge jergilikti búdjet esebinen syıaqy berilip jatqany belgili. Bul ıgi shara Ońtústik Qazaqstan oblysynda da jalǵasyn taýyp jatyr. Biraq túrkistandyq muǵalimder osy oraıda bir nárseni túsinbeı otyr dep jazady www.nur.kz.
«Ótken aptada Túrkistan qalasyndaǵy mektep muǵalimderine «premıa» dep 25 myń teńgeden berildi. Muǵalimder qýanyp, alǵystaryn aıta-aıta aqshalaryn alady ǵoı. Kóp uzamaı jeltoqsan aıynyń jalaqysy az bolyp berilgen. Sebebin surastyrsa: «Ol «premıany» senderge avans retinde berdik. Sondyqtan aılyqtan ustap qaldyq» degen jaýap alypty. Bul Túrkistandaǵy barlyq mektepte birdeı bolǵan jaǵdaı. Biraq muǵalimder jumystan qýylamyz nemese basqalaı zıany tıip ketedi dep, shaǵymdanýǵa qorqady. Negizi muǵalimder osy kúnge deıin aılyqtaryn avans etip ekige bólip alǵan emes. Bizde ortalyqtandyrylǵan býhgalterıa, ıaǵnı jalaqyny barlyq mektepke qalalyq bilim bólimindegi esepshi aýdarady. Olardyń syıaqy dep aqsha aýdaryp, ony jalaqydan ustap qalýy qanshalyqty zańdy?» – degen habar kelip tústi redaksıaǵa.
Bul máseleniń anyq-qanyǵyna kóz jetkizý úshin basylym tilshileri Túrkistan qalalyq bilim bóliminiń basshysy Bekarys Shoıbekovke habarlasqan bolatyn.
«Túrkistanda 73 mektep, 6 myńdaı muǵalim bar. Muǵalimderge syıaqy berý máselesi endi qarastyrylyp jatyr, áli tolyq sheshilgen joq. Aılyqty da, «premıany» da endi jiberemiz», – dep qysqa qaıyrdy ol mán-jaıdy estigennen keıin.
Sonda alty myń adamnyń alǵany avans pa, syıaqy ma? Bilim bólimi jeltoqsan aıynyń jalaqysyn áli aýdarmaǵan bolsa, álgi 25 myń teńgeni qaı aıdyń jalaqysynan eseptegen? Bul jaǵy túsiniksiz qalyp qoıýda.
