Maqtaral aýdanynda sońǵy úsh jylda jerdi tereń qopsytý tehnologıasy 30 myń gektarǵa engizilip, nátıjesinde sharýalar 2-3 ese kóp ónim alýda. Bul Táýelsizdik jyldaryndaǵy halyqtyń jetken jetistikteri. Bul týraly Maqtaral aýdanynyń ákimi Ǵ.Ismaılov OQO Aımaqtyq komýnıkasıalar qyzmetinde ótken baspasóz jıynynda málim etti.
Táýelsizdiktiń 25 jyldyǵyndaǵy jetken jetistikterin baıandaǵan Ǵ.Ismaılov 1991 jyly aýdannyń búdjeti 107,0 myń teńgeden 2016 jyly 31 426,0 mln. teńgege jetip, 294 esege artqanyn, jalpy ishki ónim 643,0 mln. teńgeden 112 004,1 mln teńgege jetkenin atap ótti. Sondaı-aq, aýdanda sońǵy bes jylda tamshylatyp sýǵarý ádisi endirilgen jerler men jylyjaılardyń alqaby eselep óskenin atap ótti.
2011 jyly Maqtaralda tamshylatyp sýǵarý ádisi 0,4 myń gektar jerge endirilgen bolsa, búginde 1,6 myń gektarǵa jetip otyr. Al, jylyjaılardyń kólemi 2011 jyly 33 gektardy qurasa, 5 jyldyń ishinde 2,5 jarym esege ósip, jalpy kólemi 83,6 gektarǵa jetken. Bıyl jylyjaılar esebinen 1500 tonna ónim óndirilip, Respýblıka turǵyndaryn qys jáne erte kóktem ýaqytynda sapaly kókónistermen qamtamasyz etýge qol jetkizilgen.
Egin sharýashylyǵy boıynsha júrgizilgen júıeli ártaraptandyrýdyń arqasynda 1991 jylmen salystyrǵanda baqsha daqyldarynyń kólemi 20 myń gektarǵa artyp – 23 myń gektardy, kókónis 4,0 myń gektarǵa artyp – 5,4 myń gektardy, kartop 0,8 myń gektarǵa artyp – 1,1 myń gektardy quraǵan. Táýelsiziktiń alǵashqy jyldary 16,5 myń tonna – kókónis, 32,6 myń tonna – baqsha, 1,9 myń tonna – kartop óndirilgen. Al osy jyly 126 myń tonna – kókónis, 607,9 tonna – baqsha, 17,1 myń tonna – kartop jınalǵan. Sondaı-aq, bıyl jospar oryndalyp, sharýalar gektarynan 25 sentnerden ónip alyp, Táýelsizdiktiń 25 jyldyǵyna zor tartý jasap otyr.
«Sharýalardyń ónimin saqtap, ári qaraı satý úshin qolaıly jaǵdaı jasaý maqsatynda 2015 jyly Jetisaı qalasynda «Maqtaral EkoProdýkt» JSHS-niń syıymdylyǵy 3000 tonnalyq jáne Myrzakent kentindegi JK Erdeshovqa tıesili 2 myń tonnalyq qoımalary salynyp paıdalanýǵa berildi» - deıdi Ǵ.Ismaılov. Odan bólek, Maqtaraldyń qaqpasynda ornalasqan Azattyq aýylynan zamanaýı úlgidegi saýda logıstıkalyq ortalyǵynyń qurylysyna 9 gektar jer rezervke alynǵanyn da ákim atap ótti.
Táýelsizdiktiń 25 jyldyǵynda Maqtaral aýdanynyń ınfraqurylymynda da kóptegen ózgerister baıqalady. Jalpy, 1991-2016 jyl aralyǵynda avtomobıl joldarynyń qanaǵattanarlyq jaǵdaıdaǵy úlesi 55%-dan asqan. Egemendiktiń alǵashqy jyldary aýdannyń gazben qamtylýy 10,6%-dy qurasa, búginde bul kórsetkish 65%-ǵa jetip otyr. Sondaı-aq, aýdan halqy 100% sýmen qamtylǵan. Óńirdiń óndiristik ınfraqurylymyn jetildirý maqsatynda «Bıznesti damytý jol kartasy 2020» baǵdarlamasy aıasynda 111 mln. teńge bólinip, jumystar júrgizilýde.
