Qazaqstan Respýblıkasynyń Prezıdentiniń 2016 jylǵy 29 qarashadaǵy Jarlyǵy boıynsha "Qazaqstan Respýblıkasynyń Táýelsizdigine 25 jyl" merekelik medalimen birqatar qaıratkerler marapattaldy. Olardyń qatarynda:
Almaty oblystyq «Jetisý» telearnasynyń Bas dırektory Beısen Quranbek «Eren eńbegi úshin» marapattaldy.
Beısen Quranbek - Ál-Farabı atyndaǵy qazaq ulttyq ýnıversıtetiniń túlegi. Eńbek jolyn respýblıkalyq «Sport» gazetinde tilshi, jaýapty hatshy qyzmetterinen bastaǵan. Al qalǵan jyldaryn qazaq televıdenıesimen baılanystyryp, «Rahat», «31-arna», «Habar», Prezıdent teleradıokesheninde qyzmet atqarǵan. 2007-2012 jyldary Almaty oblystyq «Jetisý» telearnasynyń bas dırektory boldy. 2013 jyldan «Qazaqstan» telearnasyndaǵy jalpaq jurtqa tanymal «Aıtýǵa ońaı» áleýmettik-turmystyq tok-shoýynyń júrgizýshisi. 2014 jyldyń qazan aıynda Almaty oblystyq «Jetisý» telearnasynyń bas dırektory bolyp taǵaıyndaldy. Qazaqstan Prezıdenti syılyǵynyń ıegeri (2006 jyl), QR Mádenıet qaıratkeri.
«Shalqar» radıosynyń Bas redaktory Serik Seıitman «Qazaqstan Respýblıkasynyń Táýelsizdigine 25 jyl» merekelik medaliniń ıegeri atandy. 2003 jyly Q.A.Iassaýı atyndaǵy Halyqaralyq qazaq-túrik ýnıversıtetiniń fılologıa fakúltetin, 2008 jyly ál-Farabı atyndaǵy Qazaq Ulttyq ýnıversıtetiniń magıstratýrasyn bitirgen. T.Aıbergenov atyndaǵy syılyqtyń jáne Halyqaralyq «Shabyt» festıvaliniń 1-dárejeli laýreaty. Qazaqstan Respýblıkasynyń patrıot jastaryna beriletin respýblıkalyq «Jas tulpar» syılyǵynyń ıegeri. «Qyrsyq qyzǵa qoltańba» (2006 jyl), «Qazaqtyń qany» (2010 jyl), «Qarashańyraq» (2014 jyl), memlekettik tapsyryspen «Dombyra» (2014 jyl) jyr kitaptary jaryq kórgen. Qazaqstan avtorlar qoǵamynyń jáne Qazaq radıosy Kórkemdik keńesiniń múshesi. 2006 jyldyń qańtarynan Qazaq radıosynda redaktor-júrgizýshi, sholýshy, «Rýhanıat» bas redaksıasy Bas redaktorynyń orynbasary qyzmetterin atqaryp keldi. Qazir «Shalqar» ulttyq radıosynyń Bas redaktory.
Qazaq jurtyna tanymal ánshi Ramazan Stamǵazıev te dál osyndaı marapatqa ıe boldy. Qazaqstannyń eńbek sińirgen artısi (1998). Stamǵazıev ónerge bala kezinen qushtar bolǵan. 1989 j. Almaty estrada-sırk ýchılıshesin (Q.Baıbosynov klasy boıynsha) bitirgen. 1989 jyldan "Qazaqkonsert" birlestigi quramynda óner kórsetip júr. 1994 - 98 j. estrada-sırk ýchılıshesinde, 1999 jyldan Almaty konservatorıasynda (kazirgi Qazaq ulttyq konservatorıasy) pedagogıkalyq jumyspen shuǵyldanady. Á.Qashaýbaev atyndaǵy ánshiler baıqaýynyń jeńimpazy.
Sonymen qatar Almat Isádilge de "Qazaqstan Respýblıkasynyń táýelsizdigine 25 jyl" merekelik medali tabystaldy. Almaty oblysy Raıymbek aýdany, Kegen aýylyndaǵy orys orta mektebinde, aýdandyq Mýzyka mektebiniń dombyra synybynda oqyǵan. QazMÝU-dyń jýrnalısıka fakúltetin syrttaı bitirgen. Eńbek jolyn №2 Kegen orta mektebinde mýzyka páni muǵalimi retinde bastaǵan. Respýblıkalyq oqýshylar Saraıynda qyzmetker, «Almaty aqshamy» gazetinde bólim meńgerýshi, jaýapty hatshy, «Elorda» baspasynda ádebı redaktor, «Qazaq ádebıeti» gazetinde bólim meńgerýshi, Qazaq-Brıtan ýnıversıtetiniń redaksıalyq-baspa bóliminiń bas menedjeri, «Qazaq radıosy» baǵdarlamalar bóliminiń shef-redaktory, «Ádebıet aıdyny» gazeti bas redaktorynyń birinshi orynbasary, «Qazaq ýnıversıteti» gazeti bas redaktorynyń orynbasary, «Jas qazaq úni» gazeti bas redaktorynyń birinshi orynbasary, «Qazaqstan» ulttyq telearnasynyń júrgizýshi-redaktory qyzmetterin atqarǵan. Qazirgi ýaqytta respýblıkalyq «Alash aınasy» gazetide Mádenıet bóliminiń redaktory.
Aıtys aqyny, Talǵar aýdandyq másilıxatynyń depýtaty - Ábdiǵanı Bázilxan. Depýtat Ábdiǵanı ótkende ǵana Ermurat Zeıipxanulyna Talǵar qalasynan kóshe berýge muryndyq bolyp edi.
Qamshyger: Nazerke Labıhan
