Saıram aýdanynda  «Gúljamıla» sharýa qojalyǵynda  mal sharýashylyǵyn damytý boıynsha kókeıkesti máseleler qozǵalǵan semınar ótkizildi.

Ońtústik-Batys mal jáne ósimdik sharýashylyǵy ǵylymı-zertteý ınstıtýtynyń ǵalymdary ótkizgen semınar óńirdiń ózindik ereksheligin de nazarǵa alyp, usynys-pikirlerin ortaǵa saldy.  Onda mamandar paıdaly mal azyǵy taqyrybynda másele kóterdi.

Jıynda sóz alǵan aýyl sharýashylyǵy ǵylymdarynyń doktory Jarylqasyn Kúzembaıuly maldy qońdaýdyń túrli tásilderi boıynsha uzaq jyl ǵylymı-zertteý jumystarymen aınalysqanyn sóz etip, bul oraıda búgingi zamanǵa laıyq joldaryn alǵa tartty. Nátıjesinde baıytylǵan jemdik konsentrat alǵan. Onymen azyqtanǵan iri qara maldyń salmaǵy orta eseppen 1 táýlikte  800 gramǵa artyp otyrǵan. Bul buǵan qosa eshqandaı zıandyǵy joq dúnıe. Sútiniń ortasha maılylyǵy 3,88, aqýyzynyń ortasha mólsheri 3,24 paıyzǵa jetken. Sonymen qatar, qylshyq júndi qoı tuqymdarynyń etke arnalǵan saýlyqtarynyń tirileı salmaǵy táýligine 100-113,3 gramǵa kóbeıgen eken. Bul árıne, buryn sońdy bolmaǵan úlken oqıǵa dep aıtýǵa tolyq negiz bar.

         Semınar sońynda mamandar otandyq ǵalymdar oılap tapqan jańalyqtardy mal sharýashylyǵyna engizý jóninde sharýalarmen pikir bólisti. Árıne, mundaı jańalyqtardy óndiriske birtindep engizý oryndy bolatyny anyq.

Janar Álimqul