Túlkibas aýdanynda ınvestısıa tartý boıynsha nátıjeli jumystar atqarylýda. Mysaly, 2016 jyldyń 9 aıynyń qorytyndysy boıynsha negizgi kapıtalǵa – 6 518,9 mln. teńge ınvestısıa tartylǵan. Onyń ishinde 108,5 mln. teńgesi respýblıkalyq, 2 775,5 mln. teńgesi jergilikti búdjet esebinen bolsa, 993,1 mln. teńgesi kásiporyndardan jáne halyqtyń óz qarjysy, 2 641,8 mln. teńgesi qaryz ınvestısıa esebinen. Aýdanda aýyl sharýashylyq salasyna basymdyq berilgenimen, ónerkásipti damytýǵa da erekshe mán berilýde. Jyl basynan bergi 9 aıda ónerkásip kásiporyndary – 10 578,0 mln. teńgeniń ónimin óndirdi. Bul kórsetkish ótken jyldyń tıisti kezeńimen salystyrǵanda 102,7 paıyz bolyp otyr. Aýdanda 1 - iri, 6 - orta, 21- kishi jáne  4 -qosalqy barlyǵy 32 kásiporyn jumys isteýde. «Údemeli ındýstrıaldy ınovasıalyq damý» memlekettik baǵdarlamasyn júzege asyrý úshin birshama jumystar júrgizildi. Jalpy somasy 900,0 mln. teńgeden asatyn 3 jobany qarjylandyrý Indýstrıalandyrý kartasyna usynylǵan bolatyn. Onyń ekeýi oblys tarapynan maquldandy.

Elbasy qyrkúıekte ótken Úkimettiń keńeıtilgen otyrysynda «Agrobıznes 2020» baǵdarlamasy aıasynda jyl sońyna deıin agroónerkásip keshenin damytýdyń memlekettik baǵdarlamasyn ázirleýdi usynǵany belgili. Naryqqa neǵurlym qajetti ónim túrlerine nazar aýdara otyryp, aýyl sharýashylyǵy ónimderiniń kólemin ulǵaıtý jáne ártaraptandyrý qajettigin, sondaı-aq sýarmaly jerdiń aınalymyn engizý baǵdarlamanyń basymdyqtary bolýy tıis ekenin aıtty. Taý bókterinde ornalasqan Túlkibas aýdanynda aýyl sharýashylyǵy óniminiń kólemi bıylǵy 9 aıdyń qorytyndysy boıynsha 15 476,9 mln. teńge bolyp, ótken jyldyń tıisti kezeńimen salystyrǵanda 102,6 paıyzdy qurap otyr. Egistik jerdiń ıgerilýi  jáne ıgeriletin sýarmaly jer kólemi boıynsha berilgen  jospar 100% oryndalǵan.