Ońtústik Qazaqstan oblysynda tórt túlikti qoldan uryqtandyrýǵa da basty nazar aýdarylyp otyr. Saıramdyq mal sharýashylyǵynyń mamandary da bul úrdisten shet qalmaı, múmkindikterdi meılinshe tıimdi paıdalanyp qalýdy jan-jaqty oılastyrýda. Aýdandyq aýyl sharýashylyǵy bólimindegi mamandardyń aıtýynsha, ár aýyldyq okrýgte barlyǵy 27 qoldan uryqtandyrý tiregi salynǵan. Oǵan oblystyq búdjetten 108 mıllıon teńge bólingen. Qarajat ıgerilgen. Ásirese sút jáne et óndirý baǵytynda jumys atqaratyn sharýashylyqtarǵa orasan mindetter júktelip otyrǵan kórinedi. Ásirese, maldy asyldandyrýdyń baǵyt-baǵdary júıelenbek.
Saıram aýdanynyń mal sharýashylyǵy salasynyń damýyna baqylaý jasap, basshylyq etetin mamandardyń aıtýynsha, qazir «Em-Nur» JSHS Aqbulaq aýylyndaǵy «Shıgı ı Ko», sondaı-aq «Qýanysh MK» jeke sharýashylyqtary, Qaratóbedegi «Altyn dán» seriktestigi, Kólkent aýylyndaǵy «Abdýǵanıev» jeke kásipkerlik ujymy, Qarasý aýyldyq okrýgindegi kásipker T.Bóribekovanyń sharýa qojalyqtary «Fýd-master» seriktestigine sút ótkizip keledi. Eki arada senimdi baılanys ornaǵan.
Mamandar iri qaranyń ónimdiligi joǵary «Golshtıno-frız» jáne kádimgi qarala sıyrlardyń tuqymyn asyldandyrýdyń tıimdiligi zor ekendigine shúbá keltirmeıdi. Úkimet te tórt túlikti asyldandyrý baǵytynda sharýalarǵa arnaıy sýbsıdıa bólip otyrǵany jaıdan-jaı emes. Qazir sapa máselesi aldyńǵy orynǵa qoıylýda. Árıne, bul oraıda dıstrıbúterlik ortalyqtardyń atqaratyn sharýasy qomaqty. Al, etti mal sharýashylyǵy baǵytynda «Sybaǵa» baǵdarlamasy biraz ıgilikti tirliktiń basyn qaıyrmaq. Qazirdiń ózinde Qaınarbulaq jáne Qutarys aýyldaryndaǵy mal ósiretin sharýalar birinshi kezekte et óndirý baǵytynyń kóshin bastap úlgeripti. Bularda túliktiń tóli enesinen ajyratylmaı baǵylady. Munyń ózi ýyzyna jaryǵan tóldiń shıraq jetilip, ónimdiligi joǵary mal sanyn kóbeıtýge múmkindik berýde. Bylaısha aıtqanda, eki jaqty tıimdi ádis.
ÁSEL JANÁBİLOVA
