Klýbtar arasynda álem chempıonatynyń jartylaı fınaldyq kezdesýinde «Real Madrıd» meksıkalyq «Amerıka» klýbymen kezdesti. Oıyn 15-jeltoqsan kúni Iaponıada «Nıssan» stadıonynda ótti. 

Oıynnyń bastapqy mınýttary koróldik klýbtyń basymdylyǵymen ótti. 2016 jyly altyn dopty alyp, úzdik fýtbolshy atanǵan Krıshtıaný Ronaldý,tolyqtaı koróldik klýbty alǵa súıredi. 21-mınýtta meksıkalyq klýb oıyndaǵy alǵashqy soqqysyn jasady. 30-jasqa tolyp otyrǵan Keılor Navas týǵan kúninde qaqpasyn qurǵaq saqtaǵysy kelip, dopqa toıtarys berdi. 22-mınýtta meksıkalyq klýbtyń jartylaı qorǵaýshysy Sambýesa, Ronaldýǵa qarsy tártip buzǵany úshin paragvaılyq tóreshi Enrıke Kseresten eskertý qaǵazyn aldy. Koróldik klýb 26-mınýtta gol soǵýǵa  jaqyn qaldy. Lýkas Vaskes oń qaptaldan aıyp alańyna dopty áýelete Ronaldýǵa jetkizdi. Ronaldý baspen soqqy jasaǵanda, dop qaqpanyń baǵanasyna tıip, qaqpa torynan tabylmady. Birinshi taımnyń sońǵy mınýttarynda shabýylǵa kóp mán bergen meksıkalyq klýb qorǵanysta osaldyq tanytty. Bas tóreshi qosqan qosymsha úsh mınýtta koroldik klýb esepte alǵa shyǵyp úlgerdi. Aıyp alań aldynda Kroos qaqpaǵa jaqyn qalǵan Benzemaǵa pas shyǵardy, Benzema Mýnosty qapy qaldyryp múlt ketpedi.

Ekinshi taımda «Amerıka» fýtbolshylary gol soǵýǵa qansha tyryssa da, koróldik klýb esh múmkindik bermedi. Oıyn tizgini «Realdyń» qolynda ekenin baıqaǵan «Amerıkanyń» bas bapkeri  70-mınýtta Romeronyń ornyna Arroıony kirgizip, shabýyldy kúsheıtýge tyrysty. Eki mınýttan soń «Realdyń» bas bapkeri Zıdan da qosalqy qurammen oıynǵa jańa kúsh qosty. Kroostyń ornyna Hames Rodrıgesty alańǵa kirgizdi. 80-mınýtta Zıdan alańǵa oıyndaǵy alǵashqy goldyń avtory Benzemany Moratamen almastyryp shabýylǵa serpin qosty. Sońǵy mınýttarǵa deıin Ronaldý gol salýǵa tyrysty. Ekinshi taımnyń qosymsha ýaqytynda ofsaıdtan qashyp úlgergen Ronaldý qaqpashymen birge bir shyǵyp, Mýnosty qapy qaldyrtyp, oıyn núktesin qoıdy.

18-jeltoqsanda «Amerıka» kolýmbıalyq «Atletıkomen» úshinshi orynǵa kezdesý ótkizse, klýbtar arasynda álem chempıony ataný úshin «Real Madrıd» Japonıanyń «Kasıma Antlers» klýbymen baq synaıtyn bolady.

Avtory: Tólepbergen Malıkov