Búgingi tańda aýyldyq jerlerde jumyssyzdyqty joıýdyń birden-bir tıimdi joly – mal sharýashylyǵyn damytyp, ásirese, otbasylyq fermalardy kóptep qurý bolyp otyr. Osy oraıda, Maqtaaral aýdanynyń Yntymaq aýyl okrýginde mal sharýashylyǵyn damytý baǵdarlamasynyń pılottyq jobasy aıasynda birshama ońdy ister atqarylýda. Bul jóninde atalǵan okrýg ákimi apparatynyń bas maman-veterınary Asqar Áshimov bylaı dedi:

– Bizdiń okrýgte mal bordaqylap, et-sút daıyndaýmen aınalysatyn 16 fermer jumys isteıdi. Onyń tórteýiniń tıptik úlgidegi mal qorasy, jem-shóp bazasy jáne tehnıkasy bar. Bıyl 9 fermer 2014-2016 jyldarǵa arnalǵan mal sharýashylyǵyn damytý baǵdarlamasy boıynsha 1-3 mıllıon teńgege deıin jeńildetilgen nesıe aldy. Al, «Sybaǵa» baǵdarlamasy boıynsha nesıe alyp, isin jandandyryp otyrǵan S.Ábdirahmanovtyń fermasynda 74 buzaýly sıyr bar. Halyq úshin jappaı aınalysa alatyn ári tıimdi sala mal sharýashylyǵy ekenine kózimiz  jetken soń sońǵy kezde osy baǵytqa basymdyq berip otyrmyz.

Sol kúni biz atalmysh okrýgtegi «Áden ata» aýylyndaǵy shaǵyn otbasylyq ferma – «Begimbet ata» sharýa qojalyǵynyń ıgi isterin kórip rıza boldyq.

– Mal bordaqylaýdy 2006 jyly qolǵa aldym. Alǵashqyda 5 ógizsheni semirtip, odan paıda tabýǵa bolatynyna kózim jetken soń iri qaranyń basyn kóbeıttim. Qazir úı janyndaǵy shaǵyn qoramyzda 20 buqa bordaqylap, 12 saýyn sıyr ustap otyrmyn. Bárin óz malymnyń tóli esebinen kóbeıttim. Eshqandaı nesıe alǵan joqpyn. Ógizshelerdi 200-250 kelilik salmaqta satyp alyp, jeti-segiz aıda 350-400 kelige jetkizip, semirgen kezde etke ótkizemin. Keıbirin bazarǵa shyǵaryp, satamyn. Bıyl úıdiń janynan burynǵy jem saqtaıtyn eski qoımany satyp alyp, sonyń ishinen jańa tıpti qora, jem-shóp saqtaıtyn jaı daıyndadym. Endi memleketten jeńildetilgen nesıe alyp, ferma jumysyn odan ári damytsam deımin, – dedi atalmysh sharýa qojalyǵynyń basshysy Erkinbek Erimbetov.+

Fermer aýylda «Dinıslam» dep  atalatyn 75 oryndy otbasylyq balabaqsha ashypty. Munda 12 qyz-kelinshek jumyspen qamtylǵan. Et-sútti ózderi jetkizip beredi.

Iá, qazirgi kúni aýyldy damytýdyń birden bir utymdy joly – mal bordaqylap, ony semirtip satý ekeni belgili. Osyny durys túsinip, tereń sezingen Erkinbektiń bıznesi kópke úlgi ǵoı dep oılaımyz.

Maqtaaral aýdany.

«Ońtústik Qazaqstan» gazeti