Taıaýda "nú" mánerinde sýretke túsirýge mamandanǵan polák fotografy Ian Maklaın Almatyǵa kelip, fotosessıa jasaǵan bolatyn. Osydan keıin Qaznette daý shyqty. Áleýmettik jeli qoldanýshylary bul ónerdiń "Qazaqstan halqyn masqaralaıtynyn"  aıtyp, synaǵan edi dep habarlaıdy kaz.tengrinews.kz

Al fotograf óz suhbatynda týyndylaryna qatysty aıtylǵan synmen kelispeıtinin jetkizdi. Iannyń aıtýynsha, Internettegiler eki oqıǵany shatastyryp alǵan, olardyń biri "Qazaqstan arýlary-2017" kúntizbesiniń túsirilimderi eken de, ekinshisi Almatyda fotograftarǵa arnalǵan sheberlik dárisi eken.

İri formattaǵy kúntizbege qazaqstandyq 13 qyz qatysty. Olardyń kóbi tanymal. Keıbir málimet boıynsha, aktrısalar Gúlnara Silbaeva, Janıa Jýrınskaıa, Gúlnaz Jolanova, Bıbigúl Súıinshalıeva jáne taǵy da basqalar túsken.

Kúntizbede jalańash qyzdar joq. "Jobanyń maqsaty - Qazaqstan qyzdaryn asyl qazyna etip kórsetý", - deıdi Maklaın.

Al sheberlik dárisine qatysty fotograf jalańash modelderdi túsirgenin aıtady. "Túsirilim jumystaryna portfolıosynda osyndaı mánerde túsken sýretteri jáne osy mánerde túsý tájirıbesi bar modelderdi ǵana shaqyramyn, - deıdi Ian. - Jalańash dene myńdaǵan jyldan beri ónerde qoldanylyp keledi, munda uıat dúnıe kóre almaı otyrmyn. Fotografıada "nú" degen janr bar, modelder bar, olarǵa óz kásipteri unaıdy".  

"Qazaqstan kópultty el, halqynyń ónerge, fotografıaǵa, ómirge degen kózqarastary da ártúrli. Barlyǵyn birdeı qylýdyń qajeti joq. Ónerime joǵary baǵa beretin qazaqtar da kóp, olardyń kóbi "nú" mánerindegi fotografıamen aınalysady. Qaznette daý shyqqan kezde qazaqstandyqtardan kóptegen hat keldi. Júzdegen adam qoldaý kórsetti. Eki adam ǵana jaǵymsyz pikir jazypty. Qazaqstan - tamasha el, qyzdaryńyz óte ádemi, osy sulýlyqty álemge kórsetý úshin taǵy da kelemin", - deıdi fotograf.