Almaty qalalyq qylmystyq ister jónindegi mamandandyrylǵan aýdanaralyq sotynda №1 balalar úıindegi seksýaldyq zorlyq deregi boıynsha sot úkimi oqyldy. Balalar úıiniń 19 jastaǵy túlegi Serik Asylbekov kináli dep tanyldy, - dep habarlaıdy kaz.tengrinews.kz

QR Qylmystyq kodeksiniń 121-babynyń 4-bóligi boıynsha Asylbekov 15 jylǵa bas bostandyǵynan aıyryldy. Sonymen qatar, ol pedagogıkalyq qyzmetterdi atqarýdan ómir boıyna shekteldi.

Úkimdi sýdıa Aıtgúl Arǵymbaeva oqydy.

Aıta keteıik, bul baptyń sanksıasy ómir boıyna bas bostandyǵynan aıyrýdy qarastyrǵandyqtan, sotqa alqa bılerdi tartý qarastyrylǵan, biraq Asylbekovtyń qorǵaýshylary budan bas tartty.

Eske salaıyq, Almatydaǵy №1 balalar úıindegi daý BAQ-tarda 13 jastaǵy balanyń osy mekemeniń túleginen birneshe márte zorlanǵanyn málimdegeni jaıly aqaparattar jarıalanǵannan keıin shyqqan bolatyn.

Bastapqyda balalar úıiniń basshylyǵy kámeletke tolmaǵan balanyń málimdemesin "oıdan shyǵarǵan" dep málimdegen. Al keıin Bilim basqarmasyndaǵylar bul derek boıynsha qyzmettik tekseris júrgenin, onyń qorytyndysy boıynsha seksýaldyq tıisý oqıǵasynyń rastalmaǵanyn habarlaǵan.

Alaıda budan keıin 19 jastaǵy kúdikti ustalyp, qamaýǵa alyndy. Keıinirek mekeme dırektory qyzmetinen ketti. Al tergeý barysynda saraptama júrgizilip, onyń qorytyndysy boıynsha taǵy bir bala men qyzdyń zorlanǵany dáleldengen.