Búgin tań erteń Atyraý oblysynyń qylmystyq ister boıynsha mamandandyrylǵan aýdan aralyq sotta, birneshe aýyr qylmys istegen buryńǵy polısıa qyzmetkeri Manarbek Óteýov tergeý ızolátorynda oǵan qysym kórsetilip jatqanyn aıtty dep habarlaıdy  atpress.kz.

Atyraýda buryńǵy polısıa qyzmetkerlerine qatysty sot prosesi jalǵasyp jatyr. Buryńǵy 8 tártip saqshylarynyń  aıyptalýshylar qatarynda turýyna olardyń buryńǵy áriptesi Manarbek Óteýovtyń (fotodaǵy) haty sebep boldy. Ol  22 jylǵa bas bostandyǵynan aırylǵan. Manarbek Óteýov aýyr qylmystar jasaǵan. Onyń ishinde adam ólimi de bar.  Ol buryńǵy polısıa qyzmetkerlerine qatysty sot prosesinde kýáger retinde ótip jatyr.

Búgin sot prosesi bastalǵanda, zańgerler men BAQ kózinshe sot zalynda ol málimdeme jasady. Onyń sózinshe, tergeý ızolátorynda oǵan eshqandaı jaǵdaı jasalynbaıdy. Jylý joq, terezeler ashyq tur, ol tońatynyn aıtady. Al polısıa qyzmetkerleri oǵan moraldyq qysym kórsetinin jetkizdi. Ótken jyly ol qarsylyq retinde qasyq jutqan. Atyraý oblystyq aýrýhanaǵa jetkizilip, oǵan operasıa jasaldy. Aýrýhanadan qaıtyp kelgennen keıin dene múshesine zaqym keltiriletin karserge toǵytylǵan.

M.Óteýov bastapqy kezde buryńǵy áriptesterine qatysty bergen jaýaptarynan bas tartatynyn jetkizdi. Endi ol olardyń kinásiz ekenin aıtady.

 «Barlyq qylmysty ózim jasadym. Olardyń eshqandaı kinási joq!» deıdi ol.

Alaıda ol muny jaqyndarynyń ómiri men densaýlyǵyna alańdaǵannan keıin aıtyp otyrǵanyn atap ótti. Sonymen qatar ol «barlyǵy tezirek bitip, ony jaqyn ýaqytta lagerge jiberýin surady».

Búgingi kúnniń ekinshi jartysynda sot prosesiniń jaryssózi ótedi dep josparlanǵan. Zańgerler úkim jyldyń aıaǵynda, ıaǵnı osy aptada shyǵady dep kútken. Alaıda Manarbek Ýteýov óziniń málimdemesi arqyly ózgertýler engizdi.

Avtor: Rahım Koılybaev