Máskeýlik Kremldiń qarýlar palatasynda Aleksandr Nevskııge tıesili dýlyǵa saqtalyp keledi. Bári ádettegishe kómkerilgen: hram kúmbezi formasyndaǵy qyzyl temir, almaz, rýbın, zúmirettermen kórkemdelgen tastar. Kenet arabsha jazý! Pravoslavtyq knázdiń dýlyǵasy! Qurannyń 61-súresiniń 13-aıaty: «Taǵy basqa sender jaqsy kóretin bir nárse bar: Alla jaqtan bir kómek jáne jaqyn bir jeńis bar. (Muhammed Ǵ.S.) múminderdi qýandyr».

Ańyzǵa súıensek, Nevskııdiń dýlyǵasy XVII ǵasyrda qaıta óńdeýden ótkizilip, arnaıy ózine qaıta jasatqan. Saraı adamy Nıkıta Danılov qymbat tasty áshekeılermen tolyqtyrǵan. Jańadan óńdelgen bas kıim « Patsha Mıhaıl Fedorovıchtiń Erıhondyq dýlyǵasy» degen ataý alady.  

XX ǵasyrdyń tarıhshylary ańyzǵa senbeı, dýlyǵanyń Aleksandr Nevskııge tıesili ekenine kúmán keltiredi. Olardyń topshalaýynsha, «Erıhondyq bas kıim» Shyǵysta óńdelgen, biraq Mıhaıl Fedorovıchtiń qolyna kezdeısoq tap bolady.

Dýlyǵadaǵy arabsha jazýdy ne sebepti aldyrtyp tastamaǵany jaıly eshkim naqty túsindire almaıdy. Nemquraılyq pa? Bulaı bolýy ekitalaı. Bilmestikten be? Múmkin emes. Han saraıynda arab kallıgrafıasyn biletin tatarlar az bolǵan joq. Bir qyzyǵy,  arabtyń órme jazýy Ivan Groznyıdyń da dýlyǵasynda kezdesken. Árıne, muny jaýdyń qolynan túsken olja deýge bolady. Biraq, bildeı aty bar patsha kıilgen dýlyǵa kıedi dep aıtý aqylǵa qonymsyz.