Oblys kóleminde el Táýelsizdiginiń 25 jyldyǵyn merekeleý aıasynda qolǵa alynǵan senbilik sharasy Túrkistan qalasynda keń qoldaýǵa ıe boldy. 

Qaladaǵy ótip jatqan tazalyq kúnine memlekettik mekeme qyzmetkerleri jáne jeke sektor ókilderi qatysýda. Sonyń ishinde, Túrkistan qalasynyń ortalyǵyndaǵy saıajaılar, kóshe jıekteri tazalanyp, aǵash kóshetteri otyrǵyzylýda. Jáne de qalaǵa qarasty aýyldyq okrýg turǵyndary da ataýly kúnge óz úlesterin qosýda. 

Sonymen birge, el tarıhyndaǵy Táýelsizdik atty aıtýly merekeni ulyqtaýǵa baǵyttalǵan is-shara josparyna saı búgin «Táýelsizdik qurdastarynyń» aǵash kóshetterin otyrǵyzý aksıasy ótýde. Bul sharada 100-den astam jas myńǵa jýyq aǵash kóshetterin otyrǵyzýda. Aksıaǵa qatysýshy Túrkistan qalasynyń turǵyny Abaı Berden: «Táýelsizdik qurdastarynyń» aǵash kóshetterin otyrǵyzý sharasyna men de óz úlesimdi qosý úshin kelip otyrmyn. Qalamyz kórkeıip, týǵan ólkemizdiń gúldenýine qurby-qurdastarymmen qatar qoltańbamdy qaldyrǵym keledi. Keleshekte elimizdiń ósip-órkendeýine mol úles qosamyn dep senemin» - dep izgi nıetin jetkizdi. 

Osylaısha ekologıalyq sharanyń mán-mańyzyn óz isterimen arttyrýǵa úles qosyp jatqan túrkistandyqtar qyzý iske kirisip ketken.