Túrkistan qalasy ákimdiginiń májilis zalynda qala ákimi Álipbek Óserbaevtyń tóraǵalyq etýimen Túrkistan qalasy boıynsha qylmystyń aldyn alý sharalarynyń barysy jáne mal urlyǵyna nátıjeli tosqaýyl qoıý máseleleri qaraldy. Jıynǵa aýyl okrýg ákimderi men turǵyndary, sonymen qatar tıisti sala qyzmetkerleri qatysty. 

QİİB Jergilikti polısıa qyzmeti ýchaskelik polısıa bólimshesiniń basshysy Baýyrjan Isaev atalmysh máseleler boıynsha habarlama jasady. Babaıqorǵan aýyldyq okrýginiń ákimi Arman Erjigitov, Úshqaıyq aýyldyq okrýginiń ákimi Nuráli Álmerdenov, veterınarıa bóliminiń basshysy Polat Musaev, zań bóliminiń bas ınspektory Birjan Bekdildaev qosymsha habarlamalar jasap, atalǵan qylmystaryń aldyn alý, boldyrmaý turǵysynda óz taraptarynan qandaı jumystar jasalyp jatqanyna toqtaldy.

Tórt túliktiń urlyǵyna qatysty atalmysh jıynǵa kelgen aýyl turǵyndary urlyqty toqtatýdyń, ony quryqtaýdyń joldaryn birlese sheshý qajettigin jetkizdi. Sonymen qatar mal urlyǵynyń jıileýiniń basty sebebi baqtashynyń bolmaýy ekenin de aıtty.

«Mal ashýy – jan ashýy» demekshi, tórt túligi qoldy bolyp, shyǵynǵa ushyrap jatqan aýyl turǵyndarynyń janaıqaıy kimdi de bolsyn beı-jaı qaldyrmasy anyq. 

Jıyn sońynda shahar basshysy Álipbek Óserbaev qaıtalana beretin mal urlyǵyna nátıjeli tosqaýyl qoıý qajettigin basa aıtyp, naqty tapsyrmalar bere kele, mal urlyǵynyń ashylýy barysyndaǵy jumystardy synǵa alyp, odan nátıje shyǵarýlary qajettigin de nazardan tys qaldyrmady.