Burynǵy ekonomıka mınıstri Qýandyq Bıshimbaevqa qatysty tergeý sharalary júrgizilip jatyr. Bul týraly Qazaqstan Prezıdenti Nursultan Nazarbaev aıtty, - dep habarlaıdy Tengrinews.kz tilshisi Aqordaǵa silteme jasap.
QR syrtqy ister mınıstrliginiń basshylarymen kezdesý barysynda Nursultan Nazarbaev ulttyq ekonomıkadaǵy taǵaıyndaýlarda bolyp jatqan ózgerister jaıly aıtty.
"Ulttyq ekonomıka mınıstri Qýandyq Bıshimbaev "Báıterek" holdıńindegi qyzmetinde paıda bolǵan máseleler úshin ulttyq ekonomıka mınıstri qyzmetinen bosatyldy. Qazirgi ýaqytta oǵan qatysty tergeý sharalary júrgizilip jatyr. Ulttyq ekonomıka mınıstri bolyp Tımýr Súleımenov taǵaıyndaldy. Ol alda qoıylǵan tapsyrmalardy sheshe alady dep oılaımyn", - dedi Memleket basshysy.
Aıta keteıik, keshe, 29 jeltoqsanda Tımýr Súleımenov ulttyq ekonomıka mınıstri bolyp taǵaıyndalǵan bolatyn. Oǵan deıin bul mınıstrlikti Qýandyq Bıshimbaev basqarǵan bolatyn. Ol bul qyzmette 8 aı ǵana bolǵan. Qýandyq Bıshimbaev ulttyq ekonomıka mınıstri qyzmetine deıin "Báıterek" holdıńin basqarǵan.
17 qarashada "Báıterek DEVELOPMENT" AQ basshylary ustalǵan bolatyn. Sybaılas jemqorlyqqa qarsy is-qımyl ulttyq búrosy "Báıterek DEVELOPMENT" AQ basshysynyń para alý deregine qatysty sotqa deıingi tergeý jumystaryn júrgizgen edi. Tergeý barysynda "Báıterek DEVELOPMENT" AQ laýazymdy Jaqypov A. (Basqarma tóraǵasynyń orynbasary), Aıtymbetov B. (memlekettik-jekemenshik seriktestik dıreksıasy departamentiniń basshysy) jáne Sarıev Ǵ. (basqarýshy dırektor) esimdi laýazymdy tulǵalar júıeli túrde "Nurly jol" memlekettik baǵdarlamasy aıasynda jaldamaly turǵyn úı keshenin satý qyzmetterin kórsetetin qurylys kompanıalarynan iri kólemde para alǵany anyqtaldy.
