Qaısar Qaýymbekuly 1987 jyly týylǵan. Ál-Farabı atyndaǵy Qazaq Ulttyq ýnıversıtetiniń fılologıa fakúltetin bitirgen. Qazir Almaty qalasynda turady. Qalalyq, respýblıkalyq jyr múshaıralarynyń jeńimpazy.

SAIRAM

Tentek jel kári shyńdy masqara qyp, Jaýlyǵyn tóbesinen qashqan alyp. Sol sátte jer betine túsedi eken Kógildir aspan aǵyp.

Kósilgen kókjıekti kórpe qylyp, Kúńirenip jatyrmysyń terbetilip?! Tolqyny tolaǵaı bir ǵasyrlardyń Turǵandaı sende tunyp.

Áldebir alyp kúshpen Kók-jasyl jaraldyń ba jaryq tústen?! Ǵaryshtan kók táńirdiń qasireti Kóktemniń kóz jasyndaı aǵyp túsken.

Bir túıir tamshyńnan da sher tógilip, Tolqynyń tanytpaıdy erke qylyq. Sál tereń tynys alsań ketetindeı, Aıdynyń alasura tóńkerilip.

Jazıra sher-muńyńmen, Janarda tunǵan muńdy móldirińmen. Jatyrsyń kúte-kúte kók aspannan, Ǵashyǵyń keletindeı telmireýmen.

Jap-jasyl janaryńnan saǵym ushqan, Burqanyp keziń de joq alyp-ushqan. Kógildir men de ózińdeı kóktem edim, Sarǵaıyp ketkem sondaı saǵynyshtan.

Túıiler mańǵaz taýlar bıik músin, Alardaı aq tósińnen súıip-qushyp. Pendeler, terbemeńder, jerlemeńder, Táńirdiń jerge qonǵan súıiktisin! 2007

İLE

İlem meniń , Túnermegin – sherli anam, Seni kútip jatyr alda keń dalań. Men de qaldym arman – taýǵa bara almaı, Sen de qaldyń arnań tolmaı sorlaǵan.

Sen jyladyń Balqashyńa kete almaı, Men jyladym qalqashyma jete almaı. Jurtyn ańsap bota kóńil bozdaıdy, Bulqynady buǵaýdan bir bosanbaı.

Sen de ortaıdyń, san taraý bop búlindiń, Men de ortaıdym, myń súrindim, jyǵyldym. Úni estiler jaǵalaýdan ińirde, Úıirinen adasqan bir qulynnyń.

Tolqynyńdy uzatyp sap san asaý, Taryldyń ba, beý, ilemniń jaǵasy -aý! Seni kútken qasiretti Balqashyń, Meni kútken qasıetti Alataý.

Túnermegin! İlem meniń – muńlyǵym, Sizge pana, bizge pana kim búgin?! Beton júrek, bezbúırek bul ǵasyrda , Baýyrlar da izdemeıdi bir-birin!

Tolqyp-tolqyp senen de endi qum qalar, Órteı-órteı menen de endi kúl qalar. Júrek jyltar Jetisýdan tym qursa, Jetpeı qoıdy-aý, ekeýmizge bir habar!..

Tasyp-týlap senen de endi tas qalar, Jasyp-jylap menen de endi jas qalar. Eńirep kep etegińe qulaımyn, Ekeýmizge joq qoı endi basqa amal?! 2006

ÁÝLIESHOQYMEN QOSHTASÝ Qaıyrly bolsyn sizderge, Bizden bul qalǵan Edil jurt. Qaztýǵan jyraý Áýlıe deıdi el, (Óz basym senem), Bar kıe deıdi ǵajap bir. Kóktemniń odan kóz jasyn kórem, Besigi bolǵan azaptyń.

Qaraly nardyń shýdasyndaı bop, Qap-qara bult kep iliner. Kúnbıdiń asqaq tulǵasyndaı dep, Syıynǵan keshe dúıim el.

Qyzǵaldaq terse gúl qyzdar kelip, Kúrsinip qalar keıde bir . Tún boıy kókten juldyzdardy emip, Turady aýyr oı kómip.

Batyryp kúndi, tańdy da atyryp, Táńirden medet suraımyn. Basymdy sosyn baýryna tyǵyp, Ózim de óksip jylaımyn.

Kún shyǵar tustan jetken desedi, Keýdeńe batqan qorǵasyn. Tas bolyp sosyn ketken desedi, Úısinniń uly ordasy.

Sol Táńirtaýym týǵyzǵan kúı kóp, Óshire almas endi eshkim. Tań aldyndaǵy juldyzdaı sırep, Birsin de birsin el kóshti...

Bir asqaq kúı eń qobyzdan jetken, Qulashtap salǵan han babam. Uly asqaq Úısin, Oǵyzdar ótken, O, qaıran, meniń taý-dalam!

Qosh endi, Saǵan súıenip óstim, Máńgi asqaq, darqan quz – keýde. Bizden bul qalǵan kıeli kók shyń, Qaıyrly bolmas «Sizderge»!.. (2006)

* * *

Aıbarly ata jaýymnyń esiginde ósip, Jetimim qańǵyp joǵalǵan, jesirim bosyp. Betimen ketken búlinip, besigin kesip, Túzelmeı ketti-aý qazaqtyń osy bir kóshi!

Sary nar taqqan sol kóshtiń buıdasy qalǵan, Suńqyldap baryp bastaldy kúı basy zardan. Sary ózen jaqta ǵundardyń qý basy qalǵan, Samarqan jaqta saqtardyń syrlasy qalǵan.

Aıdahar basty ata jaý qylyshyn bulǵap, Úsh júzim qurǵan shaıqaltty ulysymdy yrǵap. Áýelgi qalǵan ul-qyzym, týysym qymbat, Táýeldi bolǵan tizginim, qurysyn bul baq!

Oń ıyǵyma kún súıgen qyranymdy aldym, Sol ıyǵyma qul súıgen quranymdy aldym. Qozǵap bir kelem qaıǵysyn bula qyrlardyń, Bozdap bir kelem ústinde qula qumdardyń.

Kók bóri tekti tuqymy em baǵyzy kóktiń, Kóktegi kún, aı - kýási jazyǵy joqtyń. Kók týym seni kórdim de qazyǵym ettim, Kók táńir óziń qolda dep taǵyzym ettim! 2006

* * *

Kóktemdeı tunyq ǵumyrmyn, Kózine tolǵan shaıyrdyń. Móp-móldir muńdy shyrynmyn, Bezinen tamǵan qaıyńnyń.

Kókjıektegi qan-qyzyl. Tań aldy týǵan juldyzbyn. Kóktemge kórpe salǵyzyp, Mańdaıyn súıdim kún–qyzdyń.

Kózimdi ashsań óziń bil, Tunshyǵyp jatqan tumamyn. Bulqynyp turǵan kezim bul, Býlyǵyp qansha jyladym!

Ózegimdi ýdaı kek qysyp, Bórimin jortqan aýlaqqa. Erkelep essiz, kóp kúshik, Etegime endi jarmaspa! 2006

* * *

Bala edik qoı, bala edik, balǵyn oı kóp, Balalyqty bilippiz máńgi ǵoı dep. Meni ósirgen ózimniń «paıǵambarym» Joldasy edi ákeńniń qandy kóılek.

Birge oınadyq, birge óstik, bólinbeýshi ek, Búıter me edik sondaǵy kóńilge ersek?! Qylyǵyńa máz bolyp, qaıran atam, Tulymyńnan ıiskep «kelin» deýshi ed.

Al men tentek bilýshi em bir báleni, Sol sóz úshin júregim qurban edi. Qydyrly ómir shaldardyń sharapaty, Qulyn kóńil sezimniń qundaǵy edi.

Búlindi baq, aq kóńil shal da ketti, Bóltirik em, baqty ómir, Arlan etti. Burymyńdaı ekige bólindi irge, Bulttaı bastan aı men jyl aýnap ótti.

Jalǵan ómir kúttirgen baqqa bola, Jalǵyz jortyp ketippin jat qalaǵa. Senimińdi sezbesem, keshir meni, Seri kúndi keshirsin haq taǵala.

Jibek minez perishtem sen ediń ǵoı, Jetelegen jaqsy aǵa men edim ǵoı. Adal, ańqaý, o, meniń mahabbatym, Aıaqtalmaı qalǵan bir óleńimdeı.

Tuǵyrdaǵy qus edik shal qaıyrǵan, Túlep ushtyń, almaıyn shalǵaıyńnan. Saǵan jar da, maǵan jat baqyt kórdim, Meniń atam ıiskegen mańdaıyńnan. 2006

* * *

Bólek taǵdyr ekenbiz-aý, kesh bildim, Bólek jolda ekenbiz-aý, kesh, qurbym. Sher qozǵaǵan kúńirengish qobyzdyń, Shań qonbaǵan shanaǵyndaı eskirdim.

Shemen bolǵan sher keýdemniń selisiń, Óleń qoǵan zor keýdemniń sorysyń. Seniń janyń aýyrmaıdy men úshin, Meniń janym aýyrlaıdy sol úshin.

Kirpigińe kiriptarmyn, bodanmyn, Kúnásin de bilmeısiń sen obaldyń. Qula dúzde mańyraǵan Qozymyn, Qula qumnan qudyq qazǵan Qodarmyn.

Qolyma endi qonbaı-aq qoı, qonbasań, Senen maǵan túsip edi jol qashan?! Meni qoıshy, seni aıaımyn, «jaman» qyz, Búıter me ediń baqytsyzdaý bolmasań.

Óshirmesteı órtiń qaldy qozdaǵan, Sheshilmesteı sertim qaldy bozdaǵan. Qurǵyr qyz-aý, endi seni jyr etpen, Bul jyrdy da saǵan arnap jazbaǵam. 2011

KÓKTİŃ QYZY

Saǵan degen saǵynysh batty janǵa, Kótermeıdi kóńildi shat-dýman da. Aspanyna asyqqan perızattaı, Kete bardyń oranyp aq tumanǵa.

Kúmis boıaý sáýleli kirpigińdi, Kórgenimde keýdemnen tún túrildi. Qarmanyp em, qapyda jete almadym, Qushaǵyma aqshýlan bult ilindi.

Kóktiń qyzy-aı, kórkińde basqa min joq, Óziń jaıly estigen dastanym kóp. Áli kúngi aıtpaǵan biraq eshkim, Seni munsha sezimsiz, tasbaýyr dep.

Saǵan táńir syılapty-aý tekke qanat, Ózegimdi ókinish ótti aralap. Jerge qaıta bilsem de qonbasyńdy, Kókbórideı ulydym kókke qarap.

Nildeı qara qaıǵymmen qan boılaǵan, Qaraı-qaraı qalshıyp taýǵa aınalam. Kóshti bulttaı keýdemde saǵynyshym, Eski jurttaı qulazyp qaldy aınalam...

KESHİKKEN KÓKTEM TÝRALY

Terezemnen syńsıdy úni jel qyzdyń, Meńireý baq melshıedi taǵy únsiz. Keýdesinen barady aýnap mezgildiń, Qary juqa, qasireti qalyń qys.

Áldeqaıdan kele me ushyp qus bitken, Anaý qaıyń nege kókke talpyndy, al?! Kóktem nege keshikti dep tústikten Kún sap qarap turady uzaq shal shyńdar.

Kári taýdyń kókiregin silkilep, Kúmbir-kúmbir kúrsinedi kúreń kún. Bulttar kóshti kóz aldymda dúrkirep, Boz kúliktiń úıirindeı kileń bir.

Kún buzylsa oılar býyp ne túrli, Kókem meniń jańa týǵan tólge alań. Kóktem degen kúnikeı qyz sekildi, Kelem dese keshikpeıdi ol. Sen maǵan!

İLENİ QIMAǴANDA

Arnasynyń aıaǵy ý, aldy baldaı. Qaıdan bilsin qalaryn taǵdyry ońbaı. Ireleńdep ińirde aǵady İle, Altyn qumǵa aýnaǵan abjylandaı.

Taǵdyrymdy tapsyrǵan, qaıran İlem, Jar qumyńdy jastanǵan jaıdary İlem. Burymynan ıiskep bula qyzdyń, Aı astynda tildesken aılaǵym eń.

Júzip ótse jylystap jaı betińmen, Jıren jaly tolqyndap aı da esilgen. Jetimsirep taǵy da jalǵyz ózim, Jetisýǵa qaıtarmyn qaı betimmen?! 2012

ORALMAN

Túbirim - tereń, tuǵyrym - emen, Tirimin áli, Turanym, ońda! Ǵumyrym - qyran, tunyǵym - óleń, Qubylam - qaǵba, quranym qolda.

Seri de menmin, sheri de menmin, Qyzyldyń qyrǵyn úrkini kelgen. Bel asyp ketken bóri de menmin, Tósimdi túgel Túrki, Ǵun emgen.

Tóbeń de menmin, tóreń de menmin, Súıegim appaq, tumarym aman. Sherdi de juttym, shemen de boldym, Qul basqa shyqsa, kináli - zaman!

Zar muńym jyrda, azabym kúıde, Taǵdyrym qımas baqty oılaı berdim. Bórkimdi alǵan ázázil-dúnıe, Betimnen nege qaqpaılaı berdiń?!

Qazyǵym elde, azyǵym kópte, Ajyrap qalǵan solardan qolym. Tamyry jerde, táńiri kókte, Ǵumyry burań "oralman" boldym! 2012