Qyrkúıek aıynda «Qamshy» portalynda «Qyzylordalyq polıseı Kúlikbaevtiń kesirinen qyzmetten qýylǵanyn aıtady» atty maqala jaryq kórip, onda men óz basymnan ótken birqatar jaıttardy baıandaǵan edim.

Onda aıtylǵandardy qysqasha qaıtalasam, jaz aıynda Almatyda R. Kúlikbaev salǵan qyrǵyn kesirinen onyń turǵylyqty jeri Qyzylorda oblysy Baıqońyr qalasyndaǵy İİM ókildiginde qyzmet etip júrgen maǵan jáne birneshe polısıa qyzmetkerine kesiri tıdi. Basshylyq R. Kúlikbaevtiń Almatyǵa ketkenin tıisti oryndarǵa baıandamadyńdar dep aıyptap, meni qyzmetten shettetti.

Osyǵan baılanysty men birqatar aqparat quraldaryna habarlasyp, ózimniń qyzmetten qýylǵanymdy aıtyp shaǵymdandym. «Azattyq», «Qamshy» saıttarynyń jýrnalıserine bolǵan jaıdy baıandap aıttym. Sonymen birge, ókildikte kúndelikti qyzmette bolatyn keıbir jaǵdaılarǵa qatysty da óz kózqarastarymdy bildirip, ózim ádiletsizdik dep sanaıtyn jaıttardy kórsettim. Máselen, ókildikte qyzmet atqaratyn A. Mashrapov pen A. Mamatov degen azamattardyń jol erejesine qatysty quqyqbuzýshylyq jasap, Baıqońyr qalasyndaǵy Reseı Federasıasy jol polısıasy qyzmetkerleri jazaǵa tartqanyn, júrgizýshi kýálikterinen aırylǵandaryn, alaıda, soǵan qaramastan olardyń QR İİM Baıqońyr qalasyndaǵy ókildiginde qyzmet etip júrgenin aıtqan bolatynmyn. Olardyń polısıa ókildiginiń basshysy Y. Isaev pen onyń orynbasary B. Quraqbaevqa týystyq qatystarynyń bolýy múmkindigin buryn estıtinmin.

Sol maqalada attary atalǵan D. Mashrapov pen A. Mamatov meniń ústimnen Baıqońyr qalalyq sotyna aryz túsirip, maqalada aıtylǵan jaıttardy joqqa shyǵarýdy jáne keshirim suraýdy, morallyq shyǵyn retinde 1 mıllıon teńge óndirip berýdi surady. Sotta taraptardyń oılary tyńdaldy.

Sol sot prosesi barysynda atalǵan eki qyzmetker, ıaǵnı, M. Mashrapov: «2012 jylǵy 17 qyrkúıekte RF memleketiniń sotynyń ákimshilik qaýlysymen RF ÁQBK-niń 12,26 babynyń 1 bóliginde kórsetilgen jol júrý erejesin buzǵany úshin tártiptik jazaǵa tartylǵanym (1 jyl 6 aı júrgizýshi kýáliginen aıyrylǵan) ras, biraq ta ákimshilik quqyq buzýshylyqqa tartqan bóten memlekettiń sotymen, bóten eldiń zańymen tartylǵan tártiptik jazanyń kúshi  alty aıdan keıin zańdy kúshi joıylady jáne Qazaq eliniń azamaty bolǵandyqtan, Qazaqstan zańy boıynsha jazaǵa tartylǵan emespin, Qazaqstan Respýblıkasynyń normatıvtik zańdaryn buzǵan bolyp sanalmaımyn. Sonymen qatar, júrgizýshi kýáligimdi jazaǵa tartý merzimi ótip, qaıta alǵannan keıin, 26.03.2015 jyly Ókildikte emtıhan tirkeý tobynyń ınspektory laýazymyna taǵaıyndaldym, onyń barlyǵy zańdy, sonymen meni júrgizýshi kýáligimnen aıyrylǵan kezde maǵan jaza taǵaıyndaǵan Ókildik basshysy Y. Isaev emes, onyń orynbasary G. Kım bolatyn» - dep,  meniń jazǵan maqalamnyń keıbir jerleri shyndyqqa kelmeıtindigin  aıtty. 

Al, ekinshisi A. Mamatov: «01.01.2015 jyly men Baıqońyr qalasynda júrip RF ÁQBK-niń 12.27 babynyń 2 bóliginde kórsetilgen jol júrý erejelerin buzǵandyǵymdy joqqa shyǵarmaımyn, ras. Bul jóninde Ókildiktiń jeke quramynda talqylanyp, sol kezdegi Ókildiktiń bastyǵynyń orynbasary Q. Appazovtyń buıryǵymen «qyzmetine tolyq sáıkes emes týraly» tártiptik jazaǵa tartylǵanmyn.  A. Turǵanbaevtyń jazǵan aryzynda, men jol kólik oqıǵasyn jasap, aǵasy  B. Quraqbaevtyń kómegimen jazadan qutylyp, tek «sógis» jazasyn alǵan degen sózderimen kelispeımin, ol meniń ústimnen jasalǵan jala » - dep kórsetti. 

Men óz tarapymnan, sotta «Qamshy» portalyna jazǵan maqalamda atalǵan eki qyzmetkerdi ókildik basshylary Y. Isaev pen B. Quraqbaevtyń áreketterine kelispeıtinimdi bildire otyryp, ádildik turǵysynan mysalǵa keltirgenimdi, atalǵan eki qyzmetker A. Mashrapov pen A. Mamatovty jeke basyna tıisip, nuqsan keltirýdi kózdemegenimdi aıttym. Sóıtip, sotta taraptar ymyraǵa kelip, is toqtatyldy. Ymyra talabyna saı, men joǵaryda aıtylǵan maqalanyń A. Mashrapov pen A. Mamatov týraly aıtylǵan tustaryn alyp tastap, basshylarymnyń ádiletsizdigi týraly aıta kelip ol ekeýin mysalǵa keltirgenim úshin keshirim suraımyn. Qyzmetke qatysty maqala jazǵanda men ol eki qyzmetkerdiń ar-ojdanyna nuqsan keltirýdi kózdemedim jáne ondaı oıym joq. Meniń janaıqaıyma qulaq asyp, aqparattyq alań usynǵan "Qamshy" portaly ujymyna alǵysym sheksiz jáne aqparat quraly bul máselede beıtaraptyq tanytqanyn, eshkimniń ar-ojdanyna nuqsan keltirip nemes jalǵan aqparat taratpaǵanyn aıta ketkim keledi. Al, ózimniń áý bastaǵy shaǵymyma keler bolsam, sol ýaqyttan beri eshteńe ózgermedi. Polısıa ókildiginiń basshysy Y. Isaev osy kúnge deıin meni naqty bir qyzmetke almaı otyr. Áıteýir túbi ádildik jeńedi degen senimimnen aıyrylǵan joqpyn. 

Almaz Turǵanbaev