Búgin Qazaqstan Respýblıkasy Ulttyq ulany «Ońtústik» óńirlik qolbasshylyǵynda quqyqtyq tártip áskeri-Ulttyq ulannyń qurylǵanyna 25 jyl tolýyna arnalǵan saltanatty is-shara ótti. Bul týraly Qamshy portaly «Ońtústik» óńirlik qolbasshylyǵynyń Baspasóz qyzmetine silteme jasap habarlaıdy.

El Táýelsizdimen birge Kúshtik qurylymdar ishinde alǵash qurylǵan burynǵy İshki ásker, qazirgi Ulttyq ulannyń tól merekesin «Ońtústik» óńirlik qolbasshylyǵynyń jeke quramy erekshe atap ótti. Saltanatty jıynǵa óńirlik qolbasshylyq áskerı bólimderiniń jeke quramy, sondaı-aq,  birlese áreket etýshi jáne jergilikti basqarý organdarynyń ókilderimen qatar Ulttyq ulan ardagerleri de qatysty.

Saltanatty jıyn ashyq dep jarıalanysymen, «Ońtústik» óńirlik qolbasshylyǵy qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Sabyrjan Súleımenov baıandama jasady. Ol óz baıandamasynda Ulttyq ulan áskeriniń qalyptasý, damý tarıhy, qyzmettik-jaýyngerlik jumysyna keńinen toqtaldy. Ásker tarıhyndaǵy mańyzdy oqıǵalardy, Otan aldyndaǵy boryshyn adal atqarǵan qyzmet úzdikterin atap ótti.

İs-shara barysynda jaýyngerlik qyzmet atqarýda qyraǵylyǵymen kózge túsip erekshelengen áskerı qyzmetshiler, ózara árekettestiktegi organ qyzmetkerleri jáne Ulttyq ulan ardagerleri Ulttyq ulan Bas qolbasshysynyń jáne óńirlik qolbasshylyq qolbasshysynyń gramotalarymen, «Quqyq qorǵaý áskerine 25 jyl» keýde belgilermen jáne baǵaly syılyqtarmen marapattaldy.

Ulandyqtardy tól merekelerimen quttyqtaýǵa Ulttyq ulan Bas qolbasshysynyń orynbasary general-maıor Albert Matkarımov, Almaty garnızonynyń prokýrory Tlekjan Sátken, buryn Qorǵanys mınıstriniń orynbasary qyzmetin atqarǵan  otstavkadaǵy general-maıor Ámirbek Togýsov jáne basqa da el azamattary arnaıy keldi. Quqyq qorǵaý áskeriniń áskerı qyzmetshilerine jalyndy tilekteri men jyly lebizderin arnaǵan olar, Otan qorǵaý jolyndaǵy jas jaýyngerlerdiń jigerli jolyna sáttilikter tilep, merekelerimen quttyqtady. Óz sózinde general-maıor Ámirbek Togýsov: «Burynǵy İshki ásker, qazirgi Ulttyq ulan qatarynda qyzmet etý – úlken mártebe. El qaýipsizdigin qamtamasyz etý men tynyshtyq jolynda jan aıamaı kúrese bilý – erlikke tán ıgi is. Sondyqtan da jas sardarlar men sarbazdarǵa aıtarym, anttaryńa adal, qyzmetterińe berik, isterińe myǵym bolyńdar. Óıtkeni Otan qorǵaý jolyndaǵy qyzmet qashan da abyroıly jáne abyroıly bolyp qala bermek! Ulandyqtar merekeleriń qutty bolsyn!» - dep aǵynan jaryldy.

Elimiz Táýelsizdigin jarıalaǵannan keıin Qazaqstan Qarýly Kúshteriniń ishinde alǵash bolyp Qazaqstan İshki áskeri quryldy. 1992 jyldyń 10 qańtarynda Qazaqstan Respýblıkasynyń Prezıdenti N. Á. Nazarbaev Qazaqstan Respýblıkasynyń İshki áskerlerin qurý týraly Jarlyqqa qol qoıdy. 1992 jyldyń maýsym aıynda «Qazaqstan Respýblıkasynyń İshki áskerleri týraly» Zań qabyldandy. Áskerler quramyna mańyzdy memlekettik nysandardy kúzetetin arnaıy bólimder endi. 2014 jylǵy 21 sáýirde Qazaqstan Respýblıkasynyń Prezıdenti N.Nazarbaevtyń Jarlyǵymen Qazaqstan Respýblıkasy İİM İshki áskerleri Ulttyq ulan bolyp qaıta quryldy.

25 jyl boıy burynǵy İshki ásker, qazirgi Ulttyq ulannyń áskerı qyzmetshileri Otan aldyndaǵy mindetterin atqarýda senimge selkeý túsirgen emes. Ulttyq ulan atqaratyn barlyq tapsyrmalar jaýyngerlik sıpatqa ıe. Jyldar boıyna Ulttyq ulanda Otanǵa adaldyq, ony qorǵaýǵa árqashan daıyn bolý, joǵary jaýyngerlik ázirlik, áskerı antqa adaldyq, qyraǵylyq, satylmaýshylyq, jaýyngerlik sheberlikti únemi jetildirý, tártip pen áskerı dostyqty nyǵaıtý syndy ózindik dástúrler qalyptasty.

Quqyqtyq tártip áskerleri jaýyngerlik daıyndyq ázirligi artylǵan barlyq qyzmettik-jaýyngerlik tapsyrmalardy óz ýaqytynda atqarýǵa múmkindik jasady. Uıymdastyrý jáne tájirıbelik sharalar bólimder men basqarý organdarynyń jaýyngerlik jaǵdaıyn, olardyń azamattarǵa, qoǵam men memleketke qylmystyq jáne basqa da qol suǵýshylyqtardan, tóngen qaýipti der kezinde eńserý múmkindikterin arttyrdy.

Qazaqstan Respýblıkasy Ulttyq ulany «Ońtústik» óńirlik qolbasshylyǵynyń quramyna Almaty, Shymkent, Qyzylorda, Taraz jáne Taldyqorǵan qalalarynda ornalasqan, túzeý mekemelerin kúzetý, sottalǵandardy jáne qamaýǵa alynǵandardy aıdaýyldaý, memlekettik erekshe mańyzdy nysandardy kúzetý, qoǵamdyq tártip pen qaýipsizdikti qamtamasyz etý, sonymen qatar tabıǵı, tehnogendi jáne áleýmettik sıpattaǵy tótenshe jaǵdaılardyń saldaryn joıý boıynsha  qyzmettik-jaýyngerlik tapsyrmalar oryndaıtyn 11 áskerı bólimi kiredi.  

Ótkenge kóz júgirte otyryp, Qazaqstannyń Respýblıkasynyń Táýelsiz, egemendi el retinde qalyptasýy men damýy jolynda Ulttyq ulan áskeriniń laıyqty oryn alatynyn jáne áleýmettik-saıası turaqtylyqtyń birden-bir kepili ekendigin zor senimmen aıtýǵa bolady. Óıtkeni quqyq qorǵaý áskerleri qashan da ózderine artylǵan mindetterdi tabandylyqpen oryndap, kúndelikti qyraǵy qyzmet atqarady. Ulttyq ulannyń «Ońtústik» óńirlik qolbasshylyǵynda da ózderiniń erlikterimen kózge túsken beıbit kúnniń batyrlary da barshylyq. Olar – 3 dárejeli «Aıbyn» ordeniniń ıegerleri  leıtenant Jandos Baıanbaev, pen  leıtenant Erbol Otarbaev, ózderiniń qyraǵy is-áreketteriniń arqasynda Jetigen kentinde joǵalǵan Aızada Avlatarovany taýyp, otbasyna aman-esen jetkizgen 5571 áskerı bólimi áskerı qyzmetshisi aǵa leıtenant Rýstam Serdalınov, Almaty qalasy Jetisý aýdanynda qaraqshyny qolǵa túsirgen qolbasshylyq ofıserleri maıor Ismaıyl Qadyrov pen kapıtan Pavel Feshenko, Taraz qalasynda tótenshe jaǵdaıda adamdardyń janyń arashalap qalǵan 5513 áskerı bóliminiń jaýyngerleri qatardaǵy jaýyyngerler Aman Ájenov, Iýrıı Bajın, Iýrıı Dylúk, 9 jasar balany ajaldan arashalap qalǵan áskerı jasaq quramy qatardaǵy jaýynger Amanjol Abzamov, Dosbol Aıapbergenov, İzbasar Satybaldıev jáne kúni keshe ǵana Shymkent qalasyndaǵy tótenshe jaǵdaı saldarynan bir úıdiń otbasyn opyrylyp qulaǵan úıindiniń ishinen aman-esen alyp shyqqan starshına Rýslan Bahramov. Barlyǵy da óz erlikterimen Otanǵa qaltqysyz qyzmettiń úlgisin kórsetýde.

Atap ótkimiz keletini, «Ońtústik» óńirlik qolbasshylyǵynyń áskerı qyzmetshileri jaqynda ótetin 28-shi Qysqy Ýnıversıada oıyndary  kezinde qoǵamdyq qaýipsizdik pen el tynyshtyǵyn qamtamasyz etetin bolady.

QR Ulttyq ulany  QR İshki ister organdarynyń biryńǵaı júıesine kiretin quqyq qorǵaý fýnksıalary bar áskerı qurylym. Quqyq qorǵaý áskerleri memlekettiń, qoǵamnyń, azamattardyń qaýipsizdigin, sondaı-aq adamdardyń quqyqtary men bostandyqtaryn qylmystyq jáne ózge de quqyq buzýshylyq is-áreketterden qorǵaıtyn jáne qaýipsizdigin qamtamasyz etetin áskerı qurylym. Qoldanystaǵy Áskerı doktrınaǵa sáıkes QR Ulttyq ulany mobıldi, udaıy ázirliktegi kásiptik deńgeıdegi ázirliktegi ásker bolyp quryldy.

    Shara sońy Ulttyq ulannyń 25 jyldyǵyna oraı zapastaǵy maıor Elena Evstratenkonyń kórkemdik jetekshiligimen «General» tobynyń arnaıy ázirlengen  konserttik baǵdarlamasymen ulasty.