Qazaq estradasynyń 99 paıyzy fonogrammenen án salyp, toı bıznespen jan baǵady. Shyndyqty saıratsaq, ón boıy shyndyqtan ada  qalǵan bizdiń qoǵam jalǵandyqtar men ótiriktiń otanyna aınalǵan. Ózimizdi-ózimiz ótirik qamshylap, jalǵandyqtarymyzǵa jantalasa júgiremiz de júginemiz. Saqyldap júrip turǵan ýaqyt mashınasy adam, qoǵam, zaman degen sıaqty ólshemderdi júktep alyp zyrlap barady. Soǵan ilesemiz dep biz ne istemeı jatyrmyz. Biz bárin istep jatyr ekenbiz. Ótirik eńbek etedi ekenbiz, ótirik ataq alady ekenbiz, ótirik konkýrs ótkizedi ekenbiz, ótirik óner kórsetip, ótirik án aıtady ekenbiz. Ótirik múshaıra ótkizip, ótirik aqyndar aıtysyn ótkizedi ekenbiz. Ótirik saılaýdy bastap, ótirik utady ekenbiz... Ótirik, ótirik... Osylaı ótirik órip turǵan ortada júrip «91» degen top shyǵyp edi, «Oıbaı, qurtty bizdi dep» jańaǵy ótirikshiler japa tarmaǵaı ultshyl, saltshyl, dinshil bola qalypty. Saltyn saqyrlatyp ustap júrgen qazaqty kórmedim. Salt degen qazaqqa toıda ǵana kerek. Din bolsa ólgende ǵana kerek. Ultshyldyq namys bar ma bizde?!

      Eı, durystap bir án tyńdaı almaıtyn boldyq qoı! Fonogramısterden júrek aınyıdy. Qalaı deseńder de «91» zamanymen kelgen úzdik top. Júrekti terbegen óner, óner bolmaǵany ma qazaq úshin. «91» bizde bostyqty toltyrdy. Bizdiń qyzar sheteldiń sondaı alba-julba jigitterine «ólgenshe», ózimizdiń aýyldyń sar bastary men tesik qulaqtaryna «ólsin»! Obal-saýaby bolsa, kúná-azaby bolsa árkim ózi tartar. «91» degen top kelipti dep, sonshama ótirik pen jalǵandyqtan azbaǵan halyq, endi aza qala ma? Qalaı desek te 2016-nyń úzdik áni de, oryndaýshylardy da osylar. Ótirik patrıot bola qalǵandy qoıaıyq. Óz basym namaz oqıtyn adammyn, biraq bul topty qoldaımyn!

Jaqsybek QAQAN