AQSH Prezıdenti Barak Obama óziniń qoshtasý sózinde amerıkandyqtardy demokratıany qorǵaýǵa shaqyrdy. Sóziniń sońyna qaraı kóz jasyna erik berdi dep habarlaıdy bbc.com.
Óz sózinde násilshildik pen ekonomıkalyq teńsizdikti AQSH demokratıasynyń eń basty qaýpi ekenin aıtty.
Amerıkanyń demokratıasyna qaýip tóndiretin taǵy birneshe faktorlardy atap ótti. Onyń ishinde Obama ákimshiligi belsendi jumys istep, ornatqan erejelerine Donald Tramptyń beıjaı qaraýy da bar ekenin aıtty.
Barak Obama álemdik tártipke dinı fanattar men shet eldik avtokratıa qaýip tóndiretinin alǵa tartty.
«Reseı men Qytaı sekildi básekelester dál osyndaı yqpalǵa ıe bolmaýy úshin, biz óz senimderimizge satqyndyq jasamaýymyz kerek. Sol kezde kishkenteı kórshi elderge tynyshtyq bermeıtin elge aınalmaımyz» deıdi Obama.
AQSH Prezıdenti Barak Obama Chıkagodaǵy «Makkormık-pleıs» kongres-ortalyǵynda óziniń qoshtasý sózin aıtty. Ol sońǵy sózin Aq úıde emes, 2008 jyly prezıdent saılaýy kezindegi alǵashqy jeńisteriniń kýási bolǵan Chıkagodaǵy ortalyqta aıtqysy kelgenin aıtty.
Kongres-ortalyqqa Barak Obamamen birge áıeli Mıshel Obama jáne vıse-prezıdent Djo Baıden jubaıymen keldi.
Zalǵa 20 myńǵa jýyq adam jınaldy. Bastapqy kezde is-sharaǵa bıletter tegin taratylǵan. Alaıda oǵan suranys artyp, alypsatarlardyń ǵalamtordaǵy baǵasy myń dollardan asyp ketken.
Barak Obama 2008 jáne 2012 jylǵy prezıdent saılaýynda jeńiske jetkende Chıkagoda sóz sóılegen.
Obama minberden áıeli Mıshelge qarata sóılep turyp, kóz jasyna erik berdi: «Sońǵy 25 jylda sen tek meniń jubaıym, balalarymnyń anasy ǵana emes, meniń eń jaqyn dosym boldyń...Jáne men seni maqtan tutamyn. El maqtan tutady».
AQSH-tyń alǵashqy qara násildi 55 jasar prezıdenti 2008 jyly saılandy. Onyń izbasary Donald Tramp Obamanyń keıbir reformalaryn joıatynyna ýáde berdi.
2017 jyldyń 20 qańtarynda saılanǵan prezıdenttiń ınaýgýrasıasy ótkennen keıin resmı túrde qyzmetine kirisedi.
