Sot Reseıdiń burynǵy ekonomıkalyq damý mınıstri Alekseı Ýlúkaevqa tıesili bolǵan 564 mln rúbl men 15 jyljymaıtyn múlkine arest salyndy. Bul týraly «Kommersantqa» bergen suhbatynda Reseıdiń tergeý komıteti basshysynyń orynbasary Igor Krasnov aıtty.

2016 jyldyń jeltoqsan aıynyń ortasynda sot Smolensk oblysyndaǵy Ýlúkaevtyń úıi men 10 sottyq jerine arest salynǵan bolatyn.

Qazir burynǵy ekonomıkalyq damý mınıstri úı qamaǵynda otyr. Esterińizge sala keteıik, Reseıdiń ekonomıkalyq damý mınıstri Alekseı Ýlúkaev «2 mıllıon dollarǵa jýyq para aldy» degen aıyppen tutqyndalǵan bolatyn.

Seısenbi kúni 10 qańtarda Máskeý soty burynǵy mınıstrdiń úı qamaǵynyń merzimin 15 sáýirge deıin uzartty.

Tergeý ókilderi sotta ekonomıkalyq damý mınıstrligi men múlikti basqarý jónindegi qyzmetkerleri Ýlúkaevqa qarsy kýálik berdi.

Burynǵy mınıstrdiń ózi ketip qalmaý jóninde qolqat arqyly bosatýyn surap otyr. Ol kýágerlerdi qorqytpaıtynyn, pasportty alyp qoıǵandyqtan eshqaıda kete almaıtynyn aıtty.

Degenmen sot úı qamaǵanyń merzimin uzartty. Ýlúkaev sottan balalaryn kórýge, olarmen úıdiń mańynda serýendeýge ruqsat berýin suraǵan bolatyn. Biraq sot qabyldamady.

Reseı Federaldyq tergeý komıtetiniń habarlaýynsha, Ýlúkaev Federaldyq qaýipsizdik qyzmetiniń (nemese FSB) keshendi tergeý sharalarynyń nátıjesinde ustalǵan.  Tergeý komıtetiniń habarlamasynda Ýlúkaev ekonomıkalyq damý mınıstrliginiń Rosneft kompanıasyna Bashneft kompanıasynyń 50 paıyz aksıasyn ıelenýine oń baǵa bergeni úshin eki mıllıon dollar para alǵany aıtylady. Kremldiń baspasóz hatshysy Dmıtrıı Peskov atalǵan aıyptaýdyń bultartpas dálelder negizinde qoıylǵanyn sóıledi. Alekseı Ýlúkaev Reseıde 1991 jyldan beri tutqyndalǵan joǵarǵy shendi memlekettik qyzmetkerlerdiń eń úlkeni bolyp otyr. Onyń aıyby sotta dáleldense 15 jylǵa bas bostandyǵynan aıyrylýy múmkin.