Astanada QR Investısıalar jáne damý mınıstrligi qyzmetkerleri arasynda Qazaqstan Respýblıkasy Táýelsizdiginiń 25 jyldyǵyna arnalǵan spartakıada ashyldy.

«Nur Otan» partıasy «Birlik» fılıalynyń «Damý» bastaýysh partıa uıymy muryndyq bolǵan sport saıysyna memlekettik organdardyń qurylymdyq bólimsheleriniń qyzmetkerleri qatysýda. Eki apta boıy memlekettik qyzmetkerler sporttyń alty túrinen – shaǵyn-fýtbol, voleıbol, ústel tenısi, toǵyzqumalaq jáne armrestlıngten jeńimpazdardy anyqtaıdy.

«Spartakıadany ótkizýdegi basty maqsat – dene shynyqtyrý men sportty nasıhattaý. Sondaı-aq, qyzmetkerlerimizdiń densaýlyǵyn nyǵaıtyp, jaqsy demalýyna jaǵdaı jasaý. Biz árdaıym bıik mejelerdi kózdep, maqsattarǵa qol jetkizýge tyrysamyz. Osyndaı sporttyq sharalar arqyly ár azamattyń áleýetin nyǵaıtyp, bolashaqqa degen senimin kúsheıtýdi jáne qarapaıym adamı qasıetterdi dáripteýdi kózdep otyrmyz»-dep atap ótti, spartakıadanyń ashylýynda mınıstrliktiń jaýapty hatshysy Zamır Saǵynov.

Shaǵyn-fýtboldan ótken alǵashqy mach pen toǵyzqumalaq básekesi spartakıadaǵa qatysýshylardyń jeńiske degen umtylysy kásibı sportshylardan esh kem túspeıtinin kórsetti. Jarysqa qatysam deýshilerge eshqandaı shekteý joq.

Toǵyzqumalaqtan ótken saıysta Avtokólik joldary komıtetiniń qyzmetkeri Aıgúl Shegebaeva jeńimpaz atansa, ekinshi orynǵa Kólik komıtetiniń ókili Erkebulan Baıbolov, úshinshi orynǵa Geologıa jáne jer qoınaýyn paıdalaný komıtetiniń qyzmetkeri Nursultan Boranbaıuly ıe boldy. Shaǵyn-fýtboldan fınaldyq machta Indýstrıaldyq damý jáne ónerkásiptik qaýipsizdik komıteti komandasyn utqan Mınıstrliktiń ortalyq apparatynyń ujymy jeńimpaz atandy. Úshinshi oryn – Kólik komıtetiniń komandasyna buıyrdy. Sporttyń basqa túrlerinen ótetin jarystar kelesi demalys kúnderi jalǵasady.