AQSH-tyń Djordjıa shtatyndaǵy Armstrong memlekettik ýnıversıteti belgili OutKast tobynyń shyǵarmashylyǵyna tutas bir kýrs arnamaqshy dep habarlaıdy massaget.kz. OutKast — djı-fank pen klasıkalyq soýl janrlaryna negizdelgen ońtústik hıp-hop baǵytyndaǵy rep-dýet. Reperler – atlanttyq hıp-hop mektebiniń jolyn jalǵaýshylar. 6 ret "Gremmı" marapatynyń laýreaty atanǵan. Outkast toby ońtústiktiń agressıvti rep janryna optımısik ún alyp kelgen erekshe top. 2014 jylǵa deıingi esep boıynsha, dýet 25 mıllıonnan astam álbom satqan. Sondaı-aq, NME, Pitchfork, Rolling Stone men Spin syndy bedeldi mýzykalyq basylymdar toptyń Aquemini jáne Stankonia atalatyn álbomdaryn úzdik dep tanyǵan. Joǵaryda atap ótilgen ıdeıanyń avtory afrıka-amerıkalyq ádebıet profesory Regına Breıdlı bolyp otyr. Breıdlı hanymnyń maqsaty –  OutKast atalatyn hıp-hop baǵytyndaǵy toptyń shyǵarmashylyǵy arqyly rep janry saıası pikir bildirý quraly bola alatynyn kórsetý. Rasynda da, OutKast tobynyń negizin qalaýshy Andre Bendjamın (Andre 3000) jáne Entvan Patton(Big Boi) esimdi reperler shtattarda meken etetin qara násildilerdiń ómirinde kezdesetin kedeılik, saýatsyzdyq jáne t.b. máselelerdi qozǵaıdy. Armstrong memlekettik ýnıversıteti AQSH-tyń ońtústigindegi Djordjıa shtatynda ornalasqan. Bul jerde násildik teńsizdik beleń alǵan. Oǵan mysal: talantty mýzykant Reı Charlz 1961 jyly óziniń konsertine shyǵarda Djordjıa shtatynyń bir qara násildi stýdentinen habarlama alady. Onda ýnıversıtet ishindegi shara kezinde aq násildilerge ǵana án salýǵa ruqsat etilip, qara násildilerge tek tamashalaýǵa týra keletini aıtylypty. Ony estigen Reı konsertin keıinge qaldyrady, óıtkeni ol násildik segregasıaǵa árqashan qarsy boldy.