Prezıdenttiń baspasóz qyzmeti "Nursultan Nazarbaev Abý-Dabı qalasyna keldi", dep habarlady.
Sapar aıasynda Qazaqstan Prezıdentiniń Birikken Arab Ámirlikteriniń memleket qaıratkerlerimen, isker top ókilderimen birqatar kelissózderi, Atap aıtqanda, Nursultan Nazarbaev Abý-Dabı ámirliginiń taq murageri, BAÁ Qarýly kúshteri Joǵarǵy Bas qolbasshysynyń orynbasary, sheıh Muhammed ben Zaıd Ál Nahaıanmen kezdesedi. Sondaı-aq H Dúnıejúzilik «Bolashaqtyń energıasy» samıtiniń jumysyna qatysýy josparlanǵan.
Aıta keter bolsaq, Memleket basshysy Abý-Dabıdiń taq murageri, Birikken Arab Ámirlikteri Qarýly kúshteriniń joǵarǵy bas qolbasshysynyń orynbasary Muhammed ben Zaıd Ál Nahaıanmen birneshe aı ǵana buryn, 21 qazanda kezdesken edi.
Qazaqstan Respýblıkasy men Birikken Arab Ámirlikteri arasyndaǵy dıplomatıalyq qatynastar 1992 jylǵy 1 qazanda ornady. QR-nyń BAÁ-degi Elshiligi 2006 jyldyń qyrkúıek aıynda ashyldy. 2013 jylǵy qazan aıynan bastap QR-nyń BAÁ-degi Tótenshe jáne Ókiletti Elshisi – Qaırat Qaıyrbekuly Lama Sharıf.
BAÁ-niń Astanadaǵy Elshiligi 2005 jyldyń qazan aıynan bastap jumys isteıdi. 2013 jyldyń sáýir aıynan bastap BAÁ-niń QR-daǵy Tótenshe jáne Ókiletti Elshisi Sýheıl Matar ál-Kıtbı bolyp tabylady. Dýbaı qalasyndaǵy QR Bas konsýldyǵy 1997 jyldan beri jumys isteıdi.
Qazaqstan men BAÁ arasyndaǵy qatynastar ózara túsinistik jáne senim atmosferasynda damyp keledi. Bul joǵary jáne basqa da deńgeılerdegi baılanystardyń oń damý serpinimen nyǵaıtylýda. QR Prezıdenti N.Á.Nazarbaevtyń BAÁ-ne resmı jáne jumys saparlary (1998, 2000, 2004, 2005, 2006, 2008, 2009, 2010, 2011, 2012 jáne 2013 jj.), sondaı-aq BAÁ-niń Prezıdenti sheıh Halıfa ben Zaıd Ál Nahaıannyń QR-na jeke saparlary (2004, 2006, 2007, 2009, 2010, 2011, 2012 jáne 2013 jj.) nátıjesinde ekijaqty qatynastardyń berik negizi qalandy.
Ekijaqty mádenı-gýmanıtarlyq qatynastar jalpy údemeli damýda jáne onyń aıasynyń turaqty keńeıý betalysy bar. 2009 jyly naýryzda Elbasynyń BAÁ-ne resmı sapary sheńberinde QR-nyń BAÁ-degi Mádenıet kúnderi ótti. 2010 jyly mamyrda Astanada BAÁ-niń Mádenıet kúnderi ótkizildi. Ámirlikter Qazaqstandy Ortalyq Azıa óńirindegi beıbitshilik pen turaqtylyqtyń qorǵany, etnosaralyq jáne konfesıaaralyq kelisimniń úlgisi dep qarastyrady. BAÁ delegasıasy Álemdik jáne dástúrli dinder lıderleriniń ekinshi (12-13 qyrkúıek 2006 j.), úshinshi (1-2 shilde 2009 j.) jáne tórtinshi (30-31 mamyr 2012 j.) sıezerine qatysty. Ábý Dabı Taq murageri, BAÁ Qarýly kúshteri Joǵary bas qolbasshysynyń orynbasary sheıh Muhammed ben Zaıd Ál Nahaıan 2011 jylǵy 30 qańtarda Astana qalasynda 7-shi qysqy Azıa oıyndarynyń saltanatty ashylý rásimine qatysty.
2014 jylǵy 30 sáýirde Ábý Dabıde Halyqaralyq kitap kórmesi sheńberinde alǵash ret arab tilinde basylǵan «Nursultan Nazarbaev: Qazaqstan Respýblıkasy Tuńǵysh Prezıdentiniń ómirbaıany» kitabynyń tusaýkeseri uıymdastyryldy.
