Tórt salmaq kategorıasy boıynsha álemniń burynǵy chempıony Edrıen Broner (32-2, 24 KO) qazaqstandyq Gennadıı Golovkındi synǵa aldy (36-0, 33 KO), - dep habarlaıdy tengrinews.kz.
Amerıkalyq Golovkın - Pakáo arasynda ótedi delingen jekpe-jegine qatysty pikir bildirdi. Ol Pakáomen Golovkınniń ornyna ózi shyqqysy keledi eken. Ol Golovkınge qaraǵanda ózi PPV boıynsha joǵary satylym jınap, úlken gonorar alyp bere alatynyn aıtyp otyr.
"Men oǵan sózsiz qajetpin. Oǵan sońǵy jekpe-jegi úshin qansha tóledi? Men muny aıtpaı-aq qoıaıyn. Meniń aıtarym, Pakáo ekeýmizdiń jekpe-jegimiz qansha jınaı alatynyn bilemin. Qyrýar aqsha! Men ózimdi qatty jarnamalaımyn, bilesizder. Men aıtarymdy aıtamyn. Golovkındi mysalǵa alaıyq. Ony Amerıkada jarnamalaǵysy keledi. Biraq ol aǵylshyn tilin bilmeıdi ǵoı. Al endi meni PPV-ǵa qoıyńyz, barlyǵy meni tamashalaıdy, óıtkeni men ne aıtyp turǵanymdy bilemin. Aıyrmashylyq osy", - dep keltiredi BoxingScene.com Bronerdiń sózin.
Eske salaıyq, Golovkın men Djeıkobs arasyndaǵy jekpe-jek 18 naýryzda Nú-Iorktegi Madison Square Garden arenasynda ótedi. Qazaqstanda jekpe-jek "Qazaqstan" jáne KazSport arnalarynan kórsetiledi.
