QR Parlament Májilisiniń depýtaty Amanjan Jamalov HQKO-daǵy ólim jaǵdaıyna qatysty bildirgen pikirin túsindirdi, - dep habarlaıdy Tengrinews.kz tilshisi.
"Men adamnyń kez kelgen jerde qaıtys bolýy múmkin ekenin aıtqym keldi, al meni joq jerden jalmaýyzǵa aınaldyrdy", - deıdi ol.
Jamalovtyń aıtýynsha, depýtat baspasóz ókilderine úkimet saǵatyndaǵy máseleler jaıyndaǵy suraqtarǵa jaýap berýi tıis edi, naqtyraq aıtqanda ol keden jáne salyq ákimshiliktendirýi jaıly aıtpaq bolypty. Biraq ol Bıshimbaevtyń ustalýy, BJZQ-ǵa qatysty qylmystyq is jáne ýaqytsha tirkeýge baılanysty suraqtar qoıylady dep kútpepti.
"Kenet jýrnalıs maǵan "Búgin HQKO-da adam óldi, HQKO-da ólgen adamdar úshin ózińizdi kinálimin dep esepteısiz be?" dep suraq qoıdy. Suraqtyń arandatý maqsatynda qoıylǵanny túsindim, sasyp qaldym. Men logıkamen oılaıtyn adammyn jáne men úshin adamnyń ólimi men HQKO-da qaıtys bolǵan adamnyń máselesin baılanystyrý qıyn boldy. Bul jaǵdaıdan habarym bolmady", - dedi depýtat.
"Meniń jalǵyz qateligim durys sózdi qoldanbaǵanym. "Ýspeh" sózin kópshilik túsingen jetistikke jetý degen maǵynada aıtqan joqpyn ǵoı. Adam ólimin jetistik dep aıtýǵa bolmaıtyny túsinikti. Esi durys adamǵa bul sózdi oqyǵan kezde barlyǵy da túsinikti bolady. Meniń aıtqym kelgeni - ólip ketý múmkindigi barlyq jerde birdeı. Mundaı jaǵdaıda adamnyń basqa qoǵamdyq orynda qaıtys bolýy da múmkin, jazmyshtyń qashan keletinin bir Alla biledi jáne sol zańdy qabyldaǵan depýtattardy biri retinde adam óldi jáne oǵan men kinálimin dep aıtý qate, shynymdy aıtaıyn", - deıdi Jamalov.
Májilismenniń aıtýynsha, ýaqytsha tirkeýdi áýejaıdaǵy qaýipsizdik sharalarymen baılanystyrýǵa bolady. Tekserý, júkti qaraý jáne jolaýshylardyń aty-jónin anyqtaý áýejaı ǵımaratynda kezek týǵyzady, biraq bul sharalarǵa qatysty eshkim de syn aıtpaıdy, sebebi bul adamdardyń qaýipsizdigi men densaýlyǵy úshin jasalyp otyr. Ýaqytsha tirkeý normasyn engizý, depýtattyń aıtýynsha, dál osyndaı maqsat úshin jasalyp otyr jáne barlyq ákimshilik máseleler úkimet deńgeıinde sheshiledi.
"Men anyqtap kórdim, mundaı qaıǵyly jaǵdaı birinshi ret bolyp otyrǵan joq eken, Qazaqstan boıynsha buǵan deıin de HQKO-larda ólim jaǵdaılary bolypty, sebebi munda kún saıyn kóptegen adam keledi. Elimiz boıynsha osyndaı qaıǵyly oqıǵanyń ondaǵan jaǵdaıy bolypty jáne olardyń ýaqytsha tirkeýmen baılanysy joq. HQKO-larda ǵana emes, basqa da qoǵamdyq oryndarda bolypty. Aýrý-syrqattyń túri kóp, barlyǵyn birdeı boljam bilý ońaı emes. Bir jaǵdaıdy ekinshisine baılanystyrýdyń qajeti joq. Dál osy jaǵdaıda naqtyly bir jaıttardy múddeli adamdar jaǵdaıdy ýshyqtyrý úshin kórsetip otyr. Bul problema úkimet deńgeıinde sheshiledi, qajetti sharalardy júrgizý kerek, al bireýler osyndaı jaǵdaılardy jınastyryp júredi, ıaǵnı mundaı jaǵdaılar bireýdiń múddesi úshin de jasalyp jatady", - dep esepteıdi Amanjan Jamalov.
"Al adam ólimin meniń qyzmetimmen baılanystyrý, men nelikten ózimdi kináli sezinýim kerek? Meni jalmaýyz ári adam balasyna qas retinde kórsete saldy. Ómir boıy adal eńbek ettim, ekonomıka ǵylymdarynyń doktorymyn, Parlamentte eńbek etip júrmin, ekonomıkalyq blok máseleleri boıynsha mamandanǵanmyn jáne paıdam da az emes. Jumysymmen, qolymnan keletin ispen, bilimimmen maqtanamyn", - dedi sońynda depýtat.
Eske salaıyq, búgin, 16 qańtarda Alataý aýdandyq Halyqqa qyzmet kórsetý ortalyǵynda 1964 jylǵy Kýntakov Jaras Nýrkıbaıuly qaıtys boldy. Ol ortalyqqa turǵylyqty jeri boıynsha tirkelý úshin kelgen. "Azamattarǵa arnalǵan úkimet" memlekettik korporasıasynyń ókilderi oqıǵa kezinde "HQKO-da adam sany kóp bolmaǵan" deıdi.
