QR Premer-Mınıstri Baqytjan Saǵyntaev Úkimet otyrysy barysynda 28-shi Búkilálemdik qysqy Ýnıversıadany ótkizý qarsańynda jaýapty memlekettik organdar men vedomstvolarǵa birqatar tapsyrmalar berdi.

Premer-Mınıstr Ýnıversıadaǵa ázirliktiń sońǵy kezeńi júrip jatqanyn jáne osyǵan baılanysty uıymdastyrýshylyq jáne qaýipsizdikti qamtamasyz etý máselelerine erekshe nazar aýdarý qajet ekenin atap ótti.

Almaty ákimdigine Investısıalar jáne damý mınıstrligimen jáne basqa da múddeli memlekettik organdarmen birlese otyryp qaýipsizdik talaptary men standarttaryna sáıkes Ýnıversıadanyń jańa nysandarynyń jumysy men kólik logıstıkasynyń barlyq máselelerin egjeıli-tegjeıli pysyqtaý máselesi taǵy bir tapsyryldy.

İshki ister mınıstrligine adamdar kóptep jınalatyn nysandarda, qonaq úılerde, sondaı-aq basqa da qoǵamdyq oryndar men qala kólikterinde órt qaýipsizdigi jaǵdaıyna baqylaýdy kúsheıtý tapsyryldy.

«Jalpy, İİM qoǵamdyq tártiptiń saqtalýyn qamtamasyz etý boıynsha barlyq máselelerdi pysyqtaýdy tapsyramyn», - dedi B. Saǵyntaev.

Sonymen qatar, Aqparat jáne komýnıkasıalar mınıstrligine aqparattyq-ımıdjdik jumystarǵa erekshe nazar aýdarý tapsyryldy. Bul jarystardy, jańalyqtar bloktaryn translásıalaýǵa da, jýrnalıserdiń jumysyn qamtamasyz etýge de qatysty.

QR Densaýlyq saqtaý jáne áleýmettik damý mınıstrligine Ýnıversıada kezinde medısınalyq qyzmet kórsetýdi turaqty baqylaýda ustaý tapsyryldy.

«Barlyq mınıstrlikter men vedomstvolardyń basshylarynan at salysyp,  qajetti kómekti kórsetýlerin suraımyn», - dep naqtylady B. Saǵyntaev.