Qurmetti, Asqar Myrzahmetuly! Men Turlybekov Baqdáýlet Almaty oblysy, Panfılov aýdany, Qońyróleń aýylynyń turǵynymyn. Sizge hat jazyp, kómek suraýymnyń basty sebebin aıtsam,  2015 jyldyń tamyz aıynda «Sybaǵa» baǵdarlamasy boıynsha etti baǵyttaǵy jas maldardy ósirý úshin iri qara (analyq mal) men tuqymdyq buqalardy satyp alýǵa 15 mıllıon 320 myń nesıe alǵanmyn.  15 mıllıon 320 myńnyń alǵashqy qaıtarymyn 2016 jyldyń  5-shi tamyzy quıdym. Negizgi borysh ótemi  900000 teńge,   Syıaqy óteý somasy úshin (prosent) 2046240 teńge tóledim. «Sybaǵa» baǵdarlamasynyń shartynda jazylǵandaı, syıaqy mólsheriniń 7%, dálirek aıtsam,  1023120 teńge meniń esebime qaıtarylýy tıis.

Ókinishke oraı, syıaqy mólsheri osy ýaqytqa deıin esepshotyma túspedi.  Nesıeni bergen Almaty oblysy «QazAgro Qarjy» AQ mamandarynyń aıtýynsha,  úkimetten qaıtarylýy tıis 7% syıaqy qarjynyń joqtyǵyna baılanysty qashan túsetini belgisiz. Bul máseleni anyqtaý úshin Astana qalasyndaǵy keńsege de qońyraý shalyp kórdim, biraq ol jerde tutqany kóterip, jaýap bergen adam bolmady. Bizge túsýi tıis qarajattyń  qashan túsetinin naqty eshkim aıta almaıdy. 2017 jyldyń aqpan aıynyń 6-shy juldyzy taǵy da 996800 teńge syıaqy mólsherin tóleýge mindettimin.

Kelisimshart boıynsha, biz nesıe qaıtarymyn 14 % quıamyz, onyń 7 % úkimet qaıtarýǵa mindetti delingen.  Sonda úkimetke qaltamyzdan quıyp otyrǵan 7% syıaqyny ala almaı otyrǵanymyz qalaı?!

Aldaǵy aqpan aıy taǵy syıaqy paıyzyn tóleıtinimdi joǵaryda aıttym. Birinshi quıǵan qarjynyń jartysyn qaıtarmaı otyrǵan úkimetke nesıemdi tólemesem, paıyzy ósken ústine óse bermek. Sonda aýyl sharýashylyǵyn damytyp, mal óndirip otyrǵan bizdeı sharýa qojalyqtarynyń jaǵdaıyn kim oılaıdy?!  «Sybaǵa» baǵdarlamasymen nesıe alyp otyrǵan talaı sharýa qojalyqtaryna óz sybaǵasynyń buıyrmaı otyrǵany alańdatady.  Birinshi syıaqynyń paıyzyn almaı turyp, ekinshi syıaqynyń boryshyn qalaı ótemekpiz?!     

Et eksporty baǵytyndaǵy jumystardy júıeleýge arnalǵan «Sybaǵa» baǵdarlamasy qarapaıym eńbek adamy úshin negizgi tirliktiń kózine aınaldy dep qýanǵan edik, endi óz qaltamyzdan quıǵan aqshany qashan alatynymyzdy bilmeı, sharasyz halde otyrmyz.

Osy másele boıynsha birneshe jerge habarlasyp, jóni túzý bir jaýap ala almaǵandyqtan,  talaı qazaqtyń muń-muqtajyn aıtyp júrgen  «Qamshy» portaly arqyly ózińizge hat jazyp otyrmyn. Atalǵan máseleni óz qaraýyńyzǵa alyp, oń sheshim taýyp beresiz degen senimdemin!