Sońǵy ýaqytta jelide «qytaılyq kúıeý bala» taqyryby órship tur, dep habarlaıdy nur.kz portaly.

Qazaqstandyq boıjetkenderdiń qytaı er-azamattarymen nekege turýyna qarsy bolǵan azamattar tipti Astanada kishigirim mıtıń ótkizgen bolatyn. Narazylyq bildirýshiler qytaılyq jigitke turmysqa shyǵýǵa batyly jetken qazaq qyzdaryn azamattyǵynan aıyrý kerektigin aıtqan.

Osy daýly máselege qatysty belgili qoǵam belsendileri ne deıdi?

"Qaryndasyńdy qatyn qylamyn" degeni aýyr tıip tur"

Geroıhan Qystaýbaev, jýrnalıs:

«Qytaı qımyldamaıdy. Al qımyldasa jutady! Jutyp ta keldi. Jaqyndaǵannyń bárin, tipti ózderin jaýlap alǵandardyń ózin jutyp qoıdy. Endi olar álemdegi yńǵaı "bergen" eldiń bárin jutýǵa kóshti. Qytaıdyń "Chaına Taýny" álemniń kóptegen elderinde bar. Bul ne? Bul - qarsylyqsyz jaýlaý! Sol sıaqty tap qazirgi bizge qoldanyp otyrǵan "Qytaı jobasy", ıaǵnı "qytaıdyń aýqatty azamattarynyń qazaq qyzdarynan qalyńdyq izdeýi" de, jutýdyń bir túri» degen jýrnalıs bul jaıtqa óz baǵasyn berdi.

Qytaılyqtardyń qazaqtan jar tańdaýy qoǵam belsendisiniń pikirinshe, ulttyń joıylýyna ákep soqtyrady.

"Qaryndasyńdy qatyn qylamyn" degeni aýyr tıip tur maǵan. Shyn máninde bul qytaıdyń qazaqqa bir tamyzýy! Qyzyńa tamǵan bir tamshy - ultyńa shashyraǵan myń tamshy! Meniń namysymdy keltirip, óltirip bara jatqan jeri de osy!

Qytaılyqtardyń qazaq qyzdaryna, meıli olar, keıbireýler aıtqandaı, jaman qyzdar bolsa da, osylaı saltanatty túrde kelip, ózderine jar tańdaı alýy - túbi ulttyń jutylýy, joıylýyna soqtyrady! Biz bul jaǵdaıda, óz erkimizben qytaılyqtarǵa kúıeýge tıip jatqan, beı-bereket qubylysty, óz qolymyzben retke keltirip, dańǵyl jol salyp bergen bolamyz. Qashanda "kúıeý" balanyń osylaı "esik ashyp" kelýin kútetin kúıge túsemiz.

Qytaıda 40 mıllıon jalǵyz basty er adam bar

«Olarda 40 mln erkek jalǵyz basty eken. Qaıtedi endi degendeı, júrekteri eljirep tur. Sonda bular, qytaıdyń degenine kónseń, sol 40 mln súrboıdaq, bary-joǵy 17 mln qazaqty, talǵamaı-aq, túgeldeı derlik ózderine "adal jar" etip ala salatynyna mılary jetpeıdi-aý deımin! Álde mılary jetse de, olarǵa sondaı jaǵdaı unaı ma? Unasa, eldi úmittemeı, óz qyzdaryn bersin. Tipti, ózderi de sol qytaılaryna erkek-urǵashy bar, úrim-butaǵymen qosa "tıip" alsyn», - dep jazady óziniń jelidegi paraqshasynda Geroıhan Qystaýbaev.

 Muhtar Shahanov, aqyn:

Belgili aqyn Muhtar Shahanov qazaq qyzdarynyń sheteldikterge turmysqa shyǵýyna úzildi-kesildi qarsy ekenin únemi aıtady. Ol jelidegi paraqshasynda sheteldikke turmysqa shyqqan qazaq qyzdaryn azamattyqtan aıyrý týraly bastama kóterdi.

"Sheteldikke turmysqa shyqqan qazaq qyzdary azamattyqtan shyǵarylsyn. Adamnyń quqynan góri bizge memlekettiń qaýipsizdigi mańyzdy. Qazaqstannyń tutastyǵy, bútindigi, bolashaǵy mańyzdy. Qoldaýlaryńyzdy suraımyn! Ár adamda ártúrli oılar bolýy zańdy. Biraq bul máselede daýlaspaı, qyryq pyshaq bolmaı shesheıik. Osy kúnge deıin ómir súrip ketken babalarymyzdyń rýhy men bolashaq urpaǵymyzdyń aldynda jaýapty sheshýshi tarıhı qadam. Atam qazaq "Jıen el bolmas" degen naqyl sózin jadyńyzdan shyǵarmańyzdar» - dep jazdy aqyn óz paraqshasynda.

Aıdos Sarym, saıasattanýshy:

Belgili saıasattanýshy qazaq qyzdaryn eshkimge bermeımiz degen ustanymdy arhaıkalyq sanaǵa teńedi.

«Jalpy qyzdarymyzdy eshkimge bermeımiz, oıbaı-oıbaı degenimizdiń ózi taza agrarlyq, arhaıkalyq sana. Iaǵnı qyzdardy jylqymen, basqa malmen teń sanaý. Ásirese «tirkeý degenimiz - stalındik túrme» degenderdiń osy túrmeden qyzdardy shyǵarmaımyz dep zarlaýy kúlkili», - deıdi ol.

Saıasattanýshy qazaq jigitterin eńbekqorlyqqa, parasattylyqqa, ynjyq bolmaýǵa shaqyrdy.

«Jigitter! Myqty bolsaq jumys isteıik, ynjyq bolmaıyq, ıt bolmaıyq, básekege qabiletti, bilimdi, parasatty, baı-baqýatty bolaıyq! Eshkimge til tıgizdirmeıik, tumsyqtyǵa shoqytpaıyq, baı men bastyqqa qorlatpaıyq! Sonda qyzdarymyz eshqaıda qashpaıdy, teńin ishinen izdeıdi», - degen qorytyndy jasady Aıdos Sarym.