Facebook áleýmettik jelisinde qazaqstandyq dúkenderdiń birinde satylymda turǵan júkti barbı oıynshyǵynyń fotosy jarıalandy. Eki qabat qýyrshaqtyń satylymyna jeli qoldanýshylary óz narazylyǵyn bildirip jatyr. Máseleniń durys-burystyǵyn bilý úshin psıholog mamanǵa habarlasýdy jón kórdik. Psıhologıa ǵylymdarynyń doktory Meıirim Erkinbekova atalmysh oıynshyqtar balanyń erte eseıýýine alyp keletinin aıtady.

«Júkti qýyrshaqtardy satý durys emes. Buǵan tosqaýyl qoıý kerek. Sebebi ol bala psıhologıasyna keri áserin beredi. Balanyń psıhologıasy oıyn arqyly qalyptasady, oıynshyqpen oınaý arqyly dúnıeni tanıdy, syrtqy ortany qabyldaıdy. Júkti barbı qýyrshaqtaryn kórgennen keıin, balanyń jynystyq tanymy erte damıdy. Bul qyzdardyń eresek ómirge erte aralasyp, erte júkti bolýyna alyp keledi. Sondyqtan balaǵa oıynshyq alyp bererde muqıat qaraý kerek» deıdi maman.

Beıkúná bala álemdi túrli túste kóredi. Onda aramdyq, jamandyq, satqyndyqty bilmeıtin,  balanyń qaıdan dúnıege keletininen beıhabar búldirshindi erte eresek ómirge aralastyrý onyń pák kózqarasyn, kirshiksiz taza dúnıetanymyn lastaýmen para-par.

Barlyǵy óz ýaqytymen bolǵany abzal. Sebebi ómir ýaqyt óte kele barlyǵyn óz ornyna qoıady.