Qazaqstan Respýblıkasy Premer-Mınıstriniń orynbasary Imanǵalı Tasmaǵambetovtiń tóralaǵylyǵymen Almaty qalasynda ótetin 2017 jylǵy 28-shi Dúnıejúzilik Qysqy Ýnıversıadaǵa daıyndyq barysy jóninde keńes ótti. Qazaqstan Respýblıkasynyń sportshylary alǵash ret Ýnıversıada baǵdarlamasyna engen sporttyń barlyq túri boıynsha saıysqa túsedi. Sonymen qatar Qazaqstan tarapynan qatysatyn 250 sportshynyń tizimi jınaqtalyp, kelisildi. Olardyń barlyǵy jınaqtalyp, saıysqa ázir tur. 

«Biz 28-shi Dúnıejúzilik qysqy Ýnıversıadaǵa daıyndyq barysy jóninde máseleni, onyń ishinde stýdenttik komandalardyń oqý-jattyǵý jıynyn ótkizý qorytyndysyn, FISU konferensıasyn uıymdastyrý jáne ulttyq qurama komandany paradtyq sport kıimderimen qamtamasyz etý máselelerin qarastyramyz». Ýnıversıadaǵa daıarlyq aıasynda 12 qysqy sport túrinen 26 oqý-jattyǵý jıyny uıymdastyryldy jáne ótkizildi. Onyń ishinde kernıng, shaıbaly hokeı, kónkı tebý sporty, mánerlep syrǵanaý, short-trek, bıatlon, shańǵy jarysy, shańǵymen tramplınnen sekirý, taý shańǵysy, frıstaıl (akrobatıka), snoýbord jáne shańǵy qos saıysy bar. Oǵan 32 joǵary oqý orny men 5 kolejden 137 sportshy qatysty.

Sondaı-aq 2-5 aqpan kúnderi «Ýnıversıtettik sport: qoǵamnyń densaýlyǵy men bolashaǵy» taqyrybynda Ýnıversıada baǵdarlamasynyń resmı bóligi sanalatyn FISU qysqy konferensıasy ótedi.  Sharaǵa álemniń 30 elinen ulttyq stýdenttik federasıalardyń prezıdentteri, JOO-nyń rektorlary, álemdik qaýymdastyqtaǵy jetekshi ǵalymdar men mamandar qatysady dep kútilýde. Aıta keteıik, Ýnıversıadanyń basty mindeti – ýnıversıtetterde sportty damytý, jastar arasynda salaýatty ómir saltyn qalyptastyrý.