Sırıalyq retteý jónindegi halyqaralyq kezdesýdiń (Astana prosesi) qorytyndysyna arnalǵan úshjaqty negizgi qujattyń mazmuny boıynsha kepilger elder ortaq túsinistikke qol jetkizýde. 

Bul jaıynda QazAqparat kelissózderdi uıymdastyrýǵa qatysy bar senimdi derekkózge silteme jasap habarlaıdy.

«Kepilger elder astanadaǵy kezdesýdiń qorytyndysy boıynsha negizgi úshjaqty qujattyń mazmuny týraly túsinistikke qol jetkizýde. Basty nazarda soǵysty toqtatý rejimin bekitý. Kelissózder prosesine Sırıa Úkimeti men opozısıasynyń ókilderi belsendi aralasýda. Tolyqtaı alǵanda ahýal - konstrýktıvti», - dep atap ótti ol.

Elordadaǵy «Rıksos» qonaq úıinde ótip jatqan Sırıa janjalyn retteý jónindegi halyqaralyq kezdesýge Sırıanyń úkimettik delegasıasynan BUU janyndaǵy osy eldiń turaqty ókili Basar al-Djafarı, shamamen 15 opozısıalyq toptyń ókili, RF Prezıdentiniń sırıalyq retteý máseleleri jónindegi arnaýly ókili Aleksandr Lavrentev, Túrkıa  Syrtqy ister mınıstrniń orynbasary Sedat Onal Iran Islam Respýblıkasy Syrtqy ister mınıstriniń orynbasary Sadek Hýseın Djaberı Ansarı, BUU bas hatshysynyń Sırıa jónindegi arnaýly ókili Staffan de Mıstýra men Qazaqstandaǵy AQSH Elshisi Djord Krol qatysýda.

Aıta keteıik, kelissózge qatysýshy taraptar saǵat 14.00-de Astana prosesiniń nátıjelerin jarıa etý úshin qorytyndy baspasóz máslıhatyna shyǵady dep kútilýde. Kelissózderge qatysýshylardy qabyldaýshy tarap barlyq delegasıa ókilderine baspasóz máslıhatyn ótkizetin arnaıy zal daıyndap qoıǵan. QR Syrtqy ister mınıstrligi ókili BAQ aldyna kimniń shyǵatyndyǵyn dóp basyp aıta alar emes. Degenmen, BUU Bas hatshysynyń Sırıa jónindegi arnaýly elshisi Staffan de Mıstýranyń jýrnalıserge brıfıń ótkizý múmkinshiligi joǵary bolyp tur.