«Tvıtterdegi» óziniń jazbasymen álemge tanylǵan 7 jasar sırıalyq Bana Alabed esimdi qyz Donald Trampqa ashyq hat jazdy dep habarlaıdy bbc.com.
«Siz sırıalyq balalarǵa kómektesýińiz kerek. Sebebi olar da sizdiń balalaryńyz sekildi beıkúná búldirshinder. Sırıalyq balalar da siz sekildi beıbit elde turýǵa qaqysy bar» dep jazady ol.
Bana otbasymen birge Alepponyń shyǵys bóliginen beıbit turǵyndardy jeltoqsan aıynda kóshirý kezinde qashqan. Qazir olar Túrkıada turady.
Bana «Tvıtterdegi» jazbalaryn Bashar Asadtyń áskeri Reseıdiń qoldaýymen qalanyń shyǵys bóligine kire bastaǵannan bastap jazdy. Bana bolǵan jaǵdaılardy aǵylshyn tilinde shyǵaryp otyrdy.
«Tvıtter» akkaýntyndaǵy jazbalaryna kómektesken anasy Fatıma Bı-bı-sı-ge Bananyń Donald Trampqa jazǵan hatyn jiberdi.
Onyń sózinshe Bana ony AQSH-tyń jańa prezıdentiniń ınaýgýrasıasyna deıin jazǵan. Sebebi ol Trampty birneshe ret teledıdardan kórgen.
Meniń atym Bana Alabed. Men sırıalyq jeti jasar Aleppolyq qyzbyn. Qorshaýda qalǵan shyǵys Aleppodan shyqqansha Sırıada turdym. Men Sırıadaǵy soǵystan zardap shekken balalardyń birimin.
Qazir men tynyshtyqta Túrkıada ómir súrip jatyrmyn. Aleppoda mektepke baryp júrdim. Biraq mekteptiń kúl-talqanyn shyǵardy. Keıbir dostarym qaıtys bolyp ketti.
Olardyń qazir menimen birge beıbit elde asyr salyp oınap júrgenin qalaýshy edim. Men Aleppoda erkin oınaı almadym. Sebebi bul ólimder qalasy.
Qazir Túrkıada kóshege shyǵyp, qýana alamyn. Mektepke bara alamyn. Ázirshe oqýdy bastamadym.
Myna álem barshamyz úshin óte mańyzdy. Siz úshin de dál solaı.
Ókinishke oraı, sırıalyq balalar qazir men sekildi ómir súrip jatqan joq. Olar Sırıanyń ár buryshynda soǵystan kóz ashpaı, úlkenderdiń isinen zardap shegip jatyr.
Ótinemin, Sırıadaǵy balalar men halyqty qutqaryńyzshy. Siz sırıalyq balalarǵa kómektesýińiz kerek. Sebebi olar da sizdiń balalaryńyz sekildi búldirshinder. Sırıalyq balalar da siz sekildi beıbit elde turýǵa qaqysy bar. Eger siz maǵan sırıalyq balalarǵa kómektesýge ýáde berseńiz, men sizdiń jańa dosyńyz bolamyn. Sırıa balalary úshin jasaǵan kómegińizdi kóremin dep úmittenemin.
Bana men onyń otbasy turatyn Túrkıa eli sırıalyq opozısıany qoldaıdy. Tramptyń sırıalyq kıkiljiń týrasyndaǵy ustanatyn pozısıasy áli belgisiz.
Donald Tramp Reseımen qarym-qatynasty nyǵaıtqysy keletinin birneshe márte aıtqan. Reseı Sırıa prezıdenti Bashar Asadty qoldaıdy.
Donald Tramptyń saılaý aldy kampanıasynda ol Sırıaǵa kómektesýdi doǵarý kerek dep aıtqan edi. Biraq jaqynda Sırıada qaýipsiz aımaqtar qurý týraly máseleni kóterdi.
Iran, Reseı jáne Túrkıa Sırıadaǵy urysty toqtatý úshin úsh aptalyq kelisimdi nyǵaıtýǵa nıetti ekenin aıtty.
