Qazaqstan bas prokýrory Jaqyp Asanov búgin Astanada 2016 jyldyń qorytyndysy jáne aldaǵy kezeńge arnalǵan mindetteri jaıly ótken bas prokýratýranyń alqa jıynynda prokýrorlardyń jumysyn synady.
Asanov prokýratýra quramynda "adal qyzmetkerlerdiń" kóp ekenin, al "masyldardyń" odan da kóbin aıtty. Bas prokýror jıynda "vedomstvo qyzmetkerleri tańnan keshke deıin memleketke paıdaly jumyspen aınalysyp jatqandaı túr jasamaýǵa" shaqyrdy. Prokýratýrada "zamanaýı oılaıtyn" qyzmetkerlerdiń baryn aıtqan Asanov áriptesterin jumys isteý tásilin, mentalıtet pen oılaýdy túbegeıli ózgertýge shaqyrdy.
Qazaqstan prezıdentiniń kómekshisi - Qaýipsizdik keńesiniń hatshysy Vladımır Jumaqanov ótken jyly prokýratýra keńseleri aldynda ózin-ózi órteý oqıǵalary bolǵanyn aıtyp, prokýrorlardy zańnyń saqtalýyn durys qadaǵalaýǵa shaqyrdy.
Jeltoqsannyń 6-sy kúni Jambyl oblysy Shý qalasynyń 48 jastaǵy turǵyny Maıra Rysmanova ulynyń sottalýyna qarsylyq bildirip, Astanadaǵy bas prokýratýranyń kire berisindegi jerde ózin órtegen. Denesi qatty kúıgen áıel birneshe kúnnen soń aýrýhanada kóz jumǵan. Bas prokýratýra Rysmanovanyń týystaryna tekserý júrgizýge ýáde bergen.
22 jeltoqsanda Shymkentte oblystyq prokýratýra aldynda jergilikti kásipker Nurken Aınabekov ústine benzın quıyp, ózin-ózi órtegen. Óz-ózin órteý kezinde onyń ústinen alaıaqtyq baby boıynsha qylmystyq is qozǵalǵan.
Aqparat kózi: Azattyq.org
