Baıan Esentaeva týraly jańalyqtar jurttyń nazarynsyz qalmaıdy. Onyń jeke ómiri mıllıondaǵan adamnyń nazarynda. Baıan Esentaeva men Tursynǵalı Alagózov birigip bergen alǵashqy suhbatynda tanystyqqa tis dárigeriniń qandaı qatysy bar ekenin, 10 maýsymdaǵy atyshýly oqıǵany qalaı bastan ótkergenin jáne alǵa qandaı jospar qoıyp otyrǵanyn aıtyp berdi. Bul týraly tengrinews habarlaıdy.
TENGRINEWS: Sizderdiń jup qyzý talqylanyp jatyr. BAQ ókilderi men áleýmettik jeli qoldanýshylary úılený toıynyń naqty qashan ótetinin bilgisi keledi.
Baıan Esentaeva: Menińshe bul suraq er adamǵa qoıyldy.
Tursynǵalı Alagózov: Biz bul máseleni sheship qoıǵanbyz. Al dostarmen, týystarmen dastarhan basyna jınalýǵa kelsek - menińshe, kóktemge qaraı. Kóktemde, mamyrda toılaımyz dep oılaımyn.
TENGRINEWS: Baıan Maqsatqyzy, kópshiliktiń aldynda júrýge úırenip qalǵan shyǵarsyz, al Tursynǵalı, siz jurttyń nazaryna endi tústińiz. Sizderdiń kóńil qosqandaryńyz jaıly jańalyqtan buryn Instagram jelisinde 500-ge jýyq jazylýshy bolsa, qazir ondaǵan myńǵa jetti. Alaıda qazirgi ýaqytta syn da aıtyla bastady. Buǵan sizdiń jaqyndaryńyzdyń kózqarasy qandaı?
Tursynǵalı Alagózov: Kúrdeli jaǵdaı. Qanshama adam qýanyp jatyr. Keıbireýlerdiń kóńili túsipti. Qazir dál aıtyp sıpattaý qıyn.
TENGRINEWS: Biraq jurttyń pikirin baqylap otyrasyz ba? Tipti pikirge jaýap berip júr ekensiz.
Tursynǵalı Alagózov: Áleýmettik jeli - ómirimdegi jańa paraq. Bul alǵashqy tájirıbe. Jelide paraqshań bolsa, onyń da jaýapkershiligi bar ekenin túsinemin. Ne jazýyńdy, ne sóıleýińdi túsinýiń kerek. Men úshin tanymal adam bolý - jańasha bir áser.
TENGRINEWS: Baıan Maqsatqyzy, siz taıaýda jala japty dep sotqa júgingen edińiz.
Baıan Esentaeva: Osy iste bilikti ekenim, bul naryqta 20 jyl júrgenim jaıly kóp aıtyldy. Ádet degen nárse bar - synǵa, maqtaýǵa baıyppen qaraımyn. Alaıda áriptesterimniń - BAQ-tyń áreketine baıyppen qaraı almaımyn. Sebebi olar jaǵymsyz dúnıelerdi erekshe yqylaspen taratady. Menińshe, bul qurmetsizdik, sondyqtan zań aıasynda áreket etkim keldi. Osy áreketimnen keıin aıtylyp jatqan syn birshama ýaqytqa toqtap qaldy. Qoldanýshylarymnyń pikirin oqımyn, árıne. Anda-sanda kóńilge tıetin sóz aıtady. Mundaıǵa jaýap qatpaýǵa tyrysamyn, dese de ádet, ımýnıtet degen de túsinik bar ǵoı. Túsinip, qoldaý bildirip jatqandarǵa alǵysym zor. Biraq keıde jaǵymsyz pikir jazatyndarǵa da jaýap bergiń keledi. Bar másele jurttyń aldyndaǵy adam bolǵanyma baılanysty. (...) Másele maǵan kelgende men nelikten qoǵam tańyp otyrǵan standarttarmen ómir súrýim kerek? Men de qarapaıym adammyn. Jaqsy kórmeýge de, jaqsy kórýge de quqym bar. Ózge áıelderden aıyrmashylyǵym joq. Ózimdi eshqashan úlgi dep atamaǵanmyn. Qoǵam bolsa adal áıel, jaqsy ana, adal, batyl, tártipti bolý kerek degen túsinikterdi ustanýym kerek dep esepteıdi. Biraq meniń de qatelesýge quqyǵym bar. İsimniń durys-burystyǵyn eshkim de bilmeıdi. Men essiz unatyp, mıymdy rettemegen bolyp shyqtym. Alaıda keıde sananyń júrekke baǵynbaıtyn sátteri bolady, al munyń aldynda bári de kerisinshe edi. Ertede men árbir qadamymdy eseptep, oılastyratynmyn. İsimniń barlyǵy da tarazylanatyn edi. Al endi 42 jasymda osyndaı jaǵdaı bolyp otyr, óz-ózimdi toqtata almaı, ne bolyp jatqanyn da túsindire almaıtyn jaǵdaı.
TENGRINEWS: Tursynǵalı, osyǵan deıin áriptesterimizge qalaı tanysqandaryńyz jaıly aıtyp bergen edińiz. Endi Baıan Maqsatqyzynyń aýzynan estigimiz keledi.
Baıan Esentaeva: Jumys babymen júrip tanystyq. Qurbym telefon shalyp, "Analar úıi" jaıly serıal túsirgisi keletin mesenat jigitter jaıly aıtty. Dym da túsinbedim. Sondyqtan birden kelisim bermedim. Maǵan "ótinemin, jigitter telefon soǵady, Tursyn degen" dedi. Kelisim berdim. Osy kezde qońyraý shalyndy. Qulaqqa jaǵymdy er adam daýsy, ádeppen sóılesti. Ádettegideı saǵat túski ekide kezdesýge kelisim berdim. Bul ótken jyldyń naýryzy bolatyn. Kezdesýdi túske deıingi ýaqytqa qoımaıtyn edim. Tursyn kómekshisimen keldi. Áńgime barysynda qalaı serıal túsirý kerek ekeni jaıynda keńes surady. Qandaı tehnologıany qoldanýǵa bolatynyn aıtyp berdim. İskerlik kezdesý boldy.
TENGRINEWS: 10 maýsymdaǵy oqıǵa kezinde Jelide ekeýińizdiń birge ushyp kelgenińiz jaıly qaýeset tarady. Birge boldyńyzdar ma?
Baıan Esentaeva: Iá, shyn máninde birge boldyq, muny jasyrǵan da joqpyn, biz ótken jyldyń kókteminde tanystyq. Men turmysta edim. Biraq men turmystaǵy ómirim jaıly, ajyrasqym kelgeni jaıly osyǵan deıin de aıtqanmyn. Munda meniń jeke ómirim jaıly áńgime bolǵan joq. İskerlik kezdesý boldy, eshkimde "is nasyrǵa shabady" degen oı bolmady. Sosyn Tursyn maǵan "Jaǵdaıyńyz qalaı? Tis dárigerine qaraldyq" dep jazyp jiberdi. Sóıtsek, ekeýmiz 20 jyl boıy bir tis dárigerine baryp júrippiz. Sosyn osylaısha áńgimemiz jarasyp ketti.
Tursynǵalı Alagózov (kúlip): Sosyn men plomba qaı tisińizde tur dep suradym.
Baıan Esentaeva: Mine, alǵashqy kezdesý iskerlik jaǵdaıynda ótti, al Tursyn birdeńe sezgen sıaqty.
TENGRINEWS: Tursynǵalı, sizde otbasy jaǵdaıyńyzǵa qatysty qıyndyqtar boldy ma? Basqa basylymdarǵa bergen suhbattaryńyzda jubaıyńyz jaıly aıtyp qaldyńyz.
Tursynǵalı Alagózov: Baıanmen tanysqan kezimde men ajyraspaǵan edim. Qazir bolsa ajyrasý ústindemin. Bul nege uzaqqa sozylyp jatqan proses deıtin shyǵarsyz, men - bıznesmenmin, zań boıynsha bólinetin múlik bar, osyǵan baılanysty, bankterge baılanysty keıbir máseleler boldy. Osynyń barlyǵyn aıaqtaýǵa ýaqyt kerek. Aqpannyń sońyna deıin másele sheshiledi dep oılaımyn. (...) Tanysqan adamdardyń 99 paıyzy nekede bolady. Bizdiń jaǵdaıda da solaı boldy.
TENGRINEWS: Al endi osy jaǵdaılardan keıin, keıbir adamdar burynǵy kúıeýińizge qatysty qylmystyq isti qaıta qaraý kerek degen pikir aıtyp júr.
Baıan Esentaeva: Ol jasaǵan qylmysy úshin bostandyǵynan aıyryldy. Biraq eń qorqynyshtysy - adamdardyń onyń áreketin quptap, "durys istedi" dep jatqany. Iaǵnı adamdar kózge shóp salǵan áıeldi jazalaý kerek dep esepteıdi, osyny qoldaıdy. Demek nekedegi áıeldiń barlyǵyn bireýdi unatyp qalǵany úshin jazalaıyq onda. Qoǵamnyń qylmyskerdi aqtap, durys istedi deýi - úreı týǵyzady. Pyshaq ala júgiretinderdi aqtaıtyn adamdar nege sonsha qatygez?
TENGRINEWS: Burynǵy kúıeýińizben habarlasyp turasyz ba?
Baıan Esentaeva: Men aralaspaımyn, balalar habarlasyp turady. Olarǵa eshqashan tyıym salmadym, onyń ústine ol - jaqsy áke.
TENGRINEWS: Oqıǵa bolǵan 10 maýsym kúni birge oralǵanyńyzdy moıyndap otyrsyz. Keıbireýler Baıandy nege arashalap almadyńyz degen suraq mazalaıtynyn aıtady.
Tursynǵalı Alagózov: Men Baıandy úıine jetkizip salýdy usynǵanmyn. Baıan qarsy bolyp, men ony taksıge otyrǵyzyp jiberdim. Bul oqıǵa taksı júrgizýshisiniń kózinshe boldy. Ol birinshi kezekte quqyq qorǵaý organdaryna habarlasýy kerek edi. (...) Adamdardyń ásirese dymdy bilmeı, túsinbeı jatyp, qorlaý sóz aıtatyny kóńilge tıedi. "Sen kinálisiń" dep, esh oılanbaı aıta salady.
TENGRINEWS: Oqıǵadan keıin aýrýhanada Baıannyń qasynda boldyńyz ba?
Tursynǵalı Alagózov: Iá, sol kúni úıge baryp, burynǵy áıelime bar shyndyqty aıttym - ajyrasý týraly sheshimimdi aıttym.
TENGRINEWS: Nelikten dál qazir qarym-qatynastaryńyz jaıly jarıa etkilerińiz keldi? Buǵan deıin nege jasyrdyńyzdar?
Baıan Esentaeva: Kezdeısoq jaǵdaı emes, árıne, barlyq málimet resmı túrde málimdeımiz degenshe jarıalanyp ketti. Biraq bul qaýeset boldy. Men basym bos emes, onyń áıeli bar, 10 maýsymda atyshýly oqıǵa boldy. 3-4 aı boıy jurttyń aldyna shyǵa almadym, osy ýaqyt boıy shetelde boldyq. Árıne, qarym-qatynasymyz jaıly sol kezde aıtý Tursynnyń áıeline de, meniń burynǵy kúıeýime de qurmetsizdik bolar edi. Biraq endi qaýeset tarap ketken soń, rastaýdy durys dep sheshtik. Iá, az ǵana ýaqyt ótti. Bul úshin de synap jatyr: "Endi ǵana ajyrastyńyz, bul qalaı bolǵany?" deıtinder bar. Ajyrasqan adam azap kórip, bir-eki jyl qınalýy kerek degen erejeni qaıdan shyǵardyńyzdar. Qoǵamnyń túsiniksiz standarttary. Árkimniń jaǵdaıynda árqalaı. (...) Adamdar erejeni buzý úshin oılap tabady. Men áýlıe emespin, basqa adamdar sekildi meniń de kúnám bar, qatelikterim de, jetistikterim de bar. Men onymen oqıǵadan keıin tanystym, al kúıeýim meni sebepsiz uryp-soqty" dep ótirik aıtqansha, shyndyqty aıtqan durys. Men eshkimdi aldaǵym kelmedi. Men qandaı ekenimdi aıttym, kórsettim. Ómirimdegi erejelerdiń biri - óz-ózime adal bolý. Al shyndyq árqashan ashshy. Tursyn batyldyǵyn menen buryn kórsetti. "Jasyrynǵanymyz jeter, "tanys emespiz" deýdi, áýejaıdan bólek shyǵýdy toqtatamyz" dedi. Men óz kitabymda jazatyn mahabbat hıkaıasy boldy.
TENGRINEWS: Birigip, demalysqa baryp keldińizder, úılený toıyna daıyndalyp jatyrsyzdar. Baıan, osydan keıin famılıańyzdy ózgertesiz be?
Baıan Esentaeva: Meniń atym onsyz da "Baıanesentaeva" bolyp ketti, Instagram-daǵy akkaýntymdy bul maqsatta ózgertken joqpyn. Adamdar men jaıly jaı ǵana "Baıan" dep sóılemeıdi. Endi aýystyrǵym keledi, sebebi men Esentaevtyń áıeli emespin. Endi Alagózovtiń jubaıy bolǵym keledi. Baıan Alagózova bolǵym keledi. Eri men áıeli bir bolýy kerek. Balaly bolyp jatsaq, sheshesi Esentaeva, ákesi Alagózov bolyp júrgenimizdi qalamaımyn.
TENGRINEWS: Tursyn, siz jetistikke jetken bıznesmensiz, "Baıannyń kúıeýi" degen attan qoryqpaısyz ba?
Tursynǵalı Alagózov: Qoryqpaımyn, men ózime senimdi adammyn. Basqasha oılaıtyndardyń sózimen de talasyp jatpaımyn.
TENGRINEWS: Al kınoǵa túskińiz kelmeı me?
Baıan Esentaeva: Men Tursynǵa kınoǵa túsetindeı keskindi ekenin aıtamyn. Bizde 40-tan asqan, dene-turpaty kelisken, boıshań, symbatty er adamnyń róline adam tabylmaıdy. Tursyn buǵan qatysty oılanamyn dedi. Bizde bir jaǵdaı bolǵan, men Táýekel Múslimniń anasynyń obrazyn somdaýym kerek boldy, biraq ákesiniń róline adam tappadyq. Kóp izdedik. Nátıjesinde sýretshi Nurlan Tórehanovty shaqyrttyq. Men sol kezde Tursynǵa "Symbattysyń" dep aıtqanmyn. Biraq ol "joq" dedi.
Tursynǵalı Alagózov (kúlip): Biraq munyń aldynda Baıan tegin túsýim kerek ekenin aıtqan. Men isker adam bolǵandyqtan "joq" dedim. Alaıda nege kınoda ózimdi synap kórmesek? Onyń ústine ákem - mýzykant, shyǵarmashylyǵy maǵan azyq boldy. Áskerden oralyp, Respýblıka saraıynyń aldynda serýendep júrgenimde bir áıel kelip, fılmge túsýge usynys jasaǵan. Sóıtsek, qytaı ımperatory týraly fılmde massovka qajet bolypty.
TENGRINEWS: Baıan Maqsatqyzy, osyǵan deıin Astanaǵa kóshemin degen edińiz.
Baıan Esentaeva: Qazir josparymyzdy birge talqylaımyz, er adamnyń pikirine baılanysty. Qandaı másele bolsa da, Tursynmen aqyldasamyn. Qazir de er adammen birge birinshe ret suhbat berip otyrmyn. Suhbat aldynda iskerlik kezdesý boldy, bızneste tájirıbesi bar adammen birigip, birinshi ret kelissóz ótkizdim. Ómirimde bıznesti úıretetin adam paıda boldy.
TENGRINEWS: "Mahabbat beketi" fılminiń jalǵasy túsiriledi degen de boljam aaıtylǵan, KeshYou tobynyń jańa quramyn tanystyrasyz dep te estidik.
Baıan Esentaeva: Demalystan keshe ǵana keldik. Qalpyma kelýim úshin uzaq ýaqyt qajet boldy. Tursyn psıhıkalyq jaǵynan saý ári baqytty sezinýim úshin bar múmkindikti jasady. Osy kezeńde kóp jaǵdaı boldy, jarty jyl boıy qalypqa keldik. Fılmniń jalǵasyna prodúserlik etkim keldi. Jalǵasyna avtorlyq quqyq alý úshin "Qazaqfılm" ókilderimen kelissóz de júrgizdik.
TENGRINEWS: Tursyn, siz "Analar úıiniń" mesenatysyz.
Tursynǵalı Alagózov: (...) Meniń anam balalar úıinde ósken, óz anasynan ala almaǵan jylýdy oılap, basqa balalardyń ana meıiriminsiz ósip jatqanyn aıtatyn. Sondyqtan osy jobany qoldaı kettim. Menińshe, 10 jyldyń ishinde osy jobanyń arqasynda balasynan bas tartatyn ata-analar bolmaıdy.
TENGRINEWS: Birge oryndaǵymyz keletin joba men jospar kóp. Suhbat sońynda oqyrmandarymyzǵa, qoldanýshylarymyzǵa ne aıtqyńyz keledi? Sizder jaıly jańalyq árqashan qyzyǵýshylyq týǵyzady, alaıda árdaıym jaǵymdy pikir ǵana jazyla bermeıdi. Oqıǵalaryńyz fılmniń daıyn turǵan senarıi.
Tursynǵalı Alagózov: Meniń aıtqym keletini - bizdi sóge-jamandamańyzdar, adamdar Baıannyń da, meniń de otbasyma túsinistikpen qaraǵanyn qalaımyz. Bireýdiń kóńiline tıý ońaı, kóp adam oılanbastan, kóńilge tıetin sóz aıtady. Árbir adam synaı alady, biraq synnyń negizi bolýy kerek. Taıaýda Baıannyń paraqshasyna kirip kórdim, 16 myń pikir bar eken - bul degenińiz oǵan beı-jaı qaraı almaıtyn 16 myń adam. Jaqsy sózder kóp, jaǵymsyzy da bar.
Baıan Esentaeva: Tursyn menimen tanysqanda "Baıan, siz serıal túsiredi dep estidim" dep suraq qoıdy. Iaǵnı ol shoý-bıznes jaıly bilmegen. Sonda men "Bizdiń elde meni tanymaıtyn adamdar da bar eken ǵoı" dep oıladym (kúldi). Bul jaqsylyqtyń nyshany. Onyń aldynda men serıal túsiretin qarapaıym adam ǵana boldym.
Áńgimelesken Ásemgúl Qasenova.
Foto: Vladımır Dmıtrıev.
